陳智燊(Jason)同懷孕5個幾月嘅太太宋熙年今日喺九龍塘出席新車發佈會，Jason就嚟升呢為人父，心情既期望又興奮，表示呢幾個月係我人生中揸車最多嘅時間，因為要接送太太，而大會就向呢對準父母送上一架BB車，合照嗰陣，Jason輕搭太太嘅肚。
着上吊帶裙嘅宋熙年明顯見肚，問重咗幾多磅？宋熙年話：「醫生話唔算重好多，但係比以前肥咗，係幸福肥。」Jason即刻話：「幸福肥，有小朋友好正常，最重要係健康同開心，之前真係好緊張，但係過咗3個月，所有嘢都穩定。」
至於BB嘅性別，Jason甜笑咁話：「我爸爸呢邊想我哋生女，因為我係4兄弟，而佢嗰邊就全女班，而佢陀嘅係仔，爺爺嫲嫲好想我哋之後生孫女，下一個會偏向生女。」宋熙年透露生B之前會去澳洲探父母。雖然宋熙年陀B胃口冇乜改變，不過Jason話當初經常提住太太唔好飲凍嘢，俾人覺得佢霸道，Jason笑指：「因為我緊張佢、關心佢。」
熙年都認為佢緊張：「佢話有啲大肚婆會抽筋，所以佢唔俾我揸車，O依家佢就做我司機，叫佢陳記。」問Jason到時會唔會入產房陪太太？佢猶豫咗一陣，問佢係咪怕血？然後Jason先話：「係因為我未諗，就算驚，都要入去撐老婆。」
(蘋果日報)
