陳奕迅同徐濠縈結婚多年一直都十分恩愛，係圈中其中一對模範夫妻～仲時不時放下閃咁，令到唔少網民都大讚佢哋好Sweet！
呢日徐濠縈、王敏奕同鄭融等噚晚喺尖沙咀出席Fendi期間限定店開幕，阿徐現身，佢仲開心宣佈：「最近連老公(陳奕迅)都影響到，真係一大喜訊，好驚喜！大家年紀唔細，都係時候，佢成日話自己唔係肥，但我挑戰佢，要佢緊緻返。最近師兄(劉浩龍)幾個月減咗30幾磅，唔只瘦仲有線條，唔使老公做到佢咁，佢依家170幾磅，瘦返啲，眼望埋去弗就得。」
阿徐仲爆Eason搵咗操張家輝嘅Michael做教練，每星期操1至3日，每日一個鐘至個半鐘，仲話Eason怕畀老婆鬧所以都積極搵教練度期，阿徐話：「呢件真係2018年最開心嘅事，同佢一齊幾十年都唔肯，不過我澄清佢係有打羽毛球同網球嘅。」阿徐話期待見到全新嘅陳奕迅，問到點樣獎勵老公？阿徐笑話：「其實我哋已經傾咗條件，不過唔講得。」記者問係咪生返個B慶祝？阿徐話：「唔嘞，我太老嘞，有6嚿腹肌好過大肚。」
（蘋果日報）
