吳千語、陳漢娜、鄭融等噚晚喺尖沙咀出席Fendi期間限定店開幕，千語現時好多時間都會喺北京工作，視北京為基地，問到有冇諗過喺北京置業？佢話：「未諗，我覺得酒店好方便，因為唔想自己做家務。」
千語自爆屋企好亂，有必要先會做家務，佢話：「如果冇晒碗食嘢我先會洗，冇晒杯先會洗杯。」問佢會唔會嚇怕啲男仔？千語話：「又冇，好似冇人嫌棄過，可能未到好差。」咁識個住家男類型嘅男友會唔會加分？千語就話：「好似唔係好需要，男友嘅作用唔係工人。」
千語與林峯分手後，直認至今未有新戀情，問到一直傳緋聞嘅內地富三代、前全國政協施子清長孫施伯雄？千語話：「食飯啫，每次食飯都話係，都要畀吓機會了解。不過成日飛，好難進一步了解，睇緣份。」
問到咁係咪即是同施生了解中？千語話：「我哋一直係朋友，識咗好耐。」講到何猷啟閃婚，千語話同佢唔太熟，但同佢家姐超蓮熟啲，如果超蓮結婚佢實會知，但o依家就仲未係。
(蘋果日報)
