同屆冠軍係陳茵媺、亞軍係周家蔚，而季軍就係呂慧儀，三甲都已嫁做人妻，兼升呢人母。先喺淺水灣搞婚禮，同時註冊，再飛法國南部慶祝。一對新人除咗有影西式婚紗相，準新娘穿上復古款式婚紗，高貴典雅，恭喜恭喜～。。。
06年落選港姐、現年31歲嘅李美慧，噚日出席無綫劇集《宮心計2：深宮計》宣傳時，承認已經同年紀大過佢25年嘅曾文豪入紙註冊結婚。李美慧稱係拍完劇集《深宮計》之後先至認識曾文豪，稱係朋友介紹，識佢嗰陣唔知男方家底。兩人拍拖半年就決定共諧連理。
有「福建幫第二代富豪」之稱嘅曾文豪，近年已十分低調，鮮有曝光，反而係佢兩位千金：曾昭亮同昭怡就活躍社交圈。曾文豪父親，係曾叱咤商界嘅百億富豪曾紀華，97年離世後，將大部分財產留俾二房（馮婉琳）所出兩子，即曾文豪同曾文能。正室王素英02年興訟質疑遺囑真偽，後撤銷起訴。曾文豪同曾文能深得父親寵愛，但金融風暴後，曾紀華百億王國資產一度蒸發只剩下值兩億幾。有指當時出手「打救」嘅，係前新世界集團主席鄭裕彤。曾文豪沾手不少生意，包括上市公司「變靚D」。曾文豪曾謂：「女人錢最好賺，我睇好呢間公司㗎，不過就無參與公司管理。我仲有其他生意，退休做少少就算，得閒都係打吓波、出吓海。」又曾與邱達根等人成立第一信用財務。
至於今次與李美慧衝破年齡距離嘅婚事，都帶來不少震撼。李美慧早前仲孖未婚夫及女兒到不丹同喜馬拉雅山八日影結婚相。李美慧大讚未婚夫係「成熟暖男」，佢今日接受傳媒訪問時話：「佢好細心，觀察仔細，佢識留意細節，如我哋食飯，知我鍾意食乜嘢，下次會叫番畀我食。佢係巨蟹座，特別細心。」李美慧就係畀未婚夫曾文豪暖男行動打動，答應求婚。李美慧喺《深宮計》雖然只係扮宮女，但佢都演得好投入，稱好鍾意演戲，不過曾文豪就肉赤未婚妻拍戲捱更抵夜。
李美慧稱，曾文豪希望佢婚後可以專心做幸福太太，退出幕前，而咁啱李美慧同無綫嘅合約亦將屆滿，故不排除轉型做KOL：「不過好多監製合作開，佢哋都好錫我，好似（梅）小青姐咁，我唔捨得佢哋。」李美慧話下月先喺淺水灣搞婚禮，同時註冊，佢話：「邀請來賓主要係至親，人數唔係好多。」有指未婚夫曾文豪好友何超瓊、李民橋等都到賀，一對新人下月再飛法國南部慶祝。
一對新人除咗有影西式婚紗相，李美慧穿上復古款式婚紗，高貴典雅，佢哋又揀咗去不丹影結婚相，穿上當民族服裝，李美慧話：「不丹係一個世外桃源。」山路程崎嶇，結果佢哋要棄車、全程坐直升機，此行豪使近百萬，李美慧話：「一個山谷去另一個山要成五、六個鐘車，我哋想慳時間，同埋坐車會辛苦啲。」
曾文豪要未婚妻舒舒服服靚靚影結婚相，當然唔慳住荷包。未婚夫咁識做，問李美慧俾佢幾分？佢話唔使扣分：「嫁得俾佢，梗係100分。」曾文豪跟前妻育有三女曾昭怡、曾昭亮，李美慧話同二女曾昭亮都係31歲左右：「我哋相處好好，乜都傾。」咁婚後會為曾文豪生BB嗎？李美慧話：「順其自然，BB係天賜嘅，唔會抗拒。」
李美慧原名李斯庭，曾用藝名韋薇選美，06年落選港姐落敗，同屆冠軍係陳茵媺、亞軍係周家蔚，而季軍就係呂慧儀，三甲都已嫁做人妻，兼升呢人母。其後李美慧加入無綫藝員訓練班，做過遊戲節目《一擲千金》嘅千金小姐，佢又做過TVB8主持《娛樂最前綫》，亦參演過多套電視劇，包括有《少年四大名捕》中飾演馬國明嘅妹妹同埋《宮心計2》等。
曾文豪與前妻育有三女，32歲大女曾昭怡於15年與郭俊賢結婚，計落仲大過後母一年，對於爸爸再婚一事，佢以WhatsApp回應：「Of course！I’m very happy for my dad，希望佢哋白頭到老！」再問到有否見過李美慧？會唔會去參加佢哋嘅法國婚禮？曾昭怡話：「Of course！有一起去過旅行。」再問到對後母有咩印象，她就大讚nice同straight forward（親切及直接）。
至於曾文豪二女曾昭亮，今年30歲，同家姐一樣，於15年與外籍男友倪嘉廉拉埋天窗，當時曾文豪都話想快啲抱孫，曾昭怡先於15年10月誕女，而曾昭亮就於16年誕下囝囝Khalil，翌年湊夠「好」字追多個女Kaia。曾昭亮噚日出席活動，講起爸爸結婚，佢就話戥爸爸高興，不過就唔會叫李美慧做「媽咪」，因為大家都係同齡，兩人相處唔錯，完全唔會有代溝。
而孻女曾昭令就同兩位家姐好唔同，較少出席ball場，佢接受周刊專訪就形容自己有啲宅，有時收工後出席活動，兩位家姐都返咗屋企湊仔女，所以都唔係次次去ball。
（蘋果日報）
