B囡驗出有聽障：「阿女因為裝咗電子耳，聽到嘅聲音係機械聲，需要言語治療去訓練講說話。我o依家讀緊言語治療課程，希望可以喺屋企教個女，如果讀得好，仲可以幫人。好感恩，因為發現得早，如果過多幾歲至發現，到時醫藥費會好貴，成效亦未必有，o依家嘅醫葯費，我都仲可以負擔到。」
趙哲妤(Uny)、衛詩、陳霽平等，今晚喺尖沙嘴出席「香港無名英雄人道獎2018」活動，趙哲妤話一向都參與同類嘅慈善活動，以前做好多，亦有助養小朋友，可以幫到人，不求回報，希望個女大個，好似媽咪咁做多啲慈善公益。
Uny囡囡小魚（Natalie）o依家16個月大，細個時已驗出有聽障，好彩發現得早，經過手術後，已經聽到兼講到，雖然唔係同齡小朋友一樣嘅進度，但都進步得好快，o依家仲識嗌媽媽。
Uny話：「阿女因為裝咗電子耳，聽到嘅聲音係機械聲，需要言語治療去訓練講說話。我o依家讀緊言語治療課程，希望可以喺屋企教個女，如果讀得好，仲可以幫人。好感恩，因為發現得早，如果過多幾歲至發現，到時醫藥費會好貴，成效亦未必有，o依家嘅醫葯費，我都仲可以負擔到。」
另外，同場嘅衛詩擔任表演嘉賓，會唱幾首英文歌，佢話：「呢個慈善組識幫到好多人，但唔係咁多人知，希望參與幫忙宣傳下，等多啲人知有呢個組識。」衛詩平時都有參與慈善工作：「啱啱去完紅十字會探望小朋友，同佢哋唱歌玩遊戲，不過班小朋友鍾意聽我唱歌，多過想同我玩遊戲。我好眼淺，每次去到探訪，見到啲患病小朋友，都會眼濕濕，但會盡量忍住，唔想喺佢哋面前喊，令到佢哋感覺自己好慘。」
佢仲話希望下次再去探訪時，可以帶埋家姐衛蘭（Janice）一齊去，唱歌畀小朋友聽，同埋買啲小禮物送畀佢哋。
(蘋果日報)
