39歲嘅廖碧兒最近高調戀上隱形億萬富豪盧啟賢(Calvin)，早前碧兒去睇趙學而演唱會，雖然男友冇一齊去，但就聯名送咗個花牌，仲放上ig story晒恩愛。
不過，《蘋果》近日不斷收到讀者爆料指，Calvin與泰國龍頭電訊公司太子女Nina一直未分手，每逢周末都會嚟香港與Calvin見面。而廖碧兒就否認，話據佢了解Calvin同Nina只係朋友，對方已經結咗婚。
日前讀者廖小姐透過「爆相爆片」，表示上周日(13號)喺亞洲國際博覽館欣賞美國流行天王Bruno Mars期間，遇見Calvin與泰藉女友Nina一齊睇騷，同行仲有一位男性朋友及兩個小女孩。
廖小姐話﹕「Calvin同埋啲小朋友入場先，Nina隔咗一陣先嚟，佢哋坐埋一齊，感覺係似情侶，因為佢哋有玩自拍，個女仔仲挨個頭落Calvin膊頭，完全唔覺有尷尬或隱瞞，但全程就唔見廖碧兒。」
Calvin等人買咗最貴坐位飛，片中見Calvin好high，趁未開騷時與其中一位小妹妹玩人浪，廖小姐續說﹕「見Calvin都有撩細路女玩，坐佢旁邊嗰位唔知係咪佢個女？」廖碧兒至截稿前未有回覆。
(蘋果日報)
