外表大大隻嘅唐文龍，經常健身做運動，但幾大隻都有一日病倒嘅時候，噚日佢仲出席步行籌款活動，表面上好似好精神，其實佢咳咗成個月，抱恙上陣。佢話中西醫都睇勻晒都仲未好，咳到好似萬箭穿心。
點知噚晚佢咳到頂唔住，漏夜去咗醫院睇醫生，醫生仲要佢照X光。佢喺Instagram上載幾張相，仲有一大堆藥，佢留言︰「人生面對最厲害的咳嗽，喉嚨發炎，終於變成氣管炎。照了『肺』，醫生說氣管『厚了』，要立即醫治，會好的，7日藥(好多藥），我累了，希望會儘快康復。」
今日搵過唐文龍，佢話︰「醫生之前畀我啲藥，係普通抗生素，原來效力唔夠，噚晚去咗醫院睇醫生，好彩肺無事，醫生話氣管炎。」問佢呢兩日嘅工作，要唔要延期？佢話︰「本來今日要去幫香港政府拍一段環保宣傳片，好多謝佢哋，o依家改咗下星期先拍。但聽日我要上北京，同趙文卓一齊宣傳新戲，所以我噚晚再去睇醫生，o依家都唔敢做運動住，朋友見到我，都話我瘦咗。」
唐文龍（左三）噚日抱恙出席步行籌款活動，同場仲有謝雪心（右二）。
佢上載照肺X光片，好彩肺冇事。
(apple daily)
