洗米嫂陳慧玲（Heidi）真係做足廿四孝阿媽，一早就帶最細囡囡周羨潼出街玩，之後佢仲將兩母女合照放上朋友圈，羨潼雖然只有兩歲，但真係生得精靈可愛，有時睇到洗米嫂擺細女啲片上網，發現佢個細女都牙尖嘴利，難怪o氹得阿媽同爹哋周焯華（洗米華）咁開心。
洗米華自從搭上模特兒Mandy Lieu後，佢同老婆Heidi關係一直麻麻，直至上年佢好努力咁箍煲，關係先慢慢有改善，最明顯係今年2月，太陽集團一班股東帶埋親朋好友一齊去北海道旅行，呢次好多人去，團友話見到洗米華同Heidi關係好明顯係好咗，最起碼唔同之前見到佢兩個係好有芥蒂，洗米嫂係全程冇乜好面色對住老公，但今次兩個成日坐埋一齊，有講有笑，真係似番對恩愛夫妻。
已經兩歲大嘅周羨潼好多表情
其實洗米嫂又真係越嚟越fit嘅，日前見佢喺facebook放咗條做緊運動嘅片出嚟，見佢舉啞鈴都好輕鬆，而且身材冇因為生咗兩個走樣。
(apple daily)
