現年47歲嘅藝人顏仟汶去年同已婚藝人詹秉熙上契為兄妹，有指兩人發生婚外情，更有傳詹秉熙正印Sandy上門「捉姦」，當時人否認此事，仲話大家只係好朋友！
而昨日網上有一條短片流出，拍攝日期為五月十日，短片中顏仟汶、詹秉熙與一班朋友唱K，兩人更合唱多曲，期間曾頭貼頭，態度頗為親暱，而當兩人齊唱《我是中國人》一曲時，情緒更見高漲，互望對唱，相當盡興。
詹秉熙接受東網訪問，他說：「答埋今次之後唔會再回應了、請諒解、我和太太本身已有些問題的，唔關任何人事，係我唔好，係我變咗，處理中、多謝關心！」
不過今日再有讀者向東網爆料，指二人已經喺女方位於錦田嘅寓所過住「半同居」生活，仲話每逢星期六、日都會見到佢哋兩個外出去超級市場購物，但就行事好小心，多數都係前後腳外出，之後先雙雙結伴返女方屋企。
讀者又透露雖然顏仟汶搬入寓所已經有半年時間，但平時冇乜打招呼，反而詹秉熙以「探朋友」為理由經常出現，仲同顏仟汶鄰居有傾有講，爆料者指：「試過有次我有啲盆栽唔要，詹秉熙見到話想拎番屋企，但結果原來係拎咗去顏仟汶屋企。」
(on.cc東網)
