陳豪同陳茵媺兩公婆今日喺樂富出席「盛湯廚房」活動，為惜食堂籌款，大會邀得森美擔任大會司儀。大會安排陳豪揀湯俾老婆飲，佢就揀咗神級fusion湯：「Because she is my 女神。」仲餵老婆飲，陳茵媺即好甜咁話：「啲湯好甜，老公餵仲甜。」
影合照嗰陣，森美主動走埋去攬住陳豪，笑言自己係第三者（港生同天諾re-u？）。陳豪受訪時笑言：「佢兩個都係我嘅人，我哋太熟喇！成日都有合作。」陳茵媺仲話自己唔會呻醋：「佢搞氣氛好好呀。」咁會否三人行食飯？陳豪笑稱：「我哋自己出街食飯都少，social life近乎零，因為工作同家庭都佔晒啲時間。」
獲老公稱為女神，陳茵媺冧笑話：’He does it all the time. ‘陳豪就話自己唔會成日讚，因為要發自真心先講：「我唔係為氹而講，要好似我咁真心。」陳茵媺即好開心咁話：「Oh my Goddess！咁會覺得特別啲嘅。」問番陳豪當年講咗咩令你嫁畀佢？兩公婆即互相對望，陳茵媺話：「好難答你。」陳豪就好有默契咁話：「唔話你知。」
陳茵媺又話自己唔係成日刻意讚老公，覺得呢啲只係生活嘅一部份。陳豪就話：「我覺得好似教小朋友咁，如果做咗好嘅嘢，就要正面去讚賞佢。係人都需要人哋鼓勵、欣賞，我哋嘅屋企都比較正面、好陽光，需要正向思想。」原來兩公婆噚晚都有去睇古巨基演唱會，陳豪話：「我初初以為係表演嘅一部份，後嚟先覺得唔對路，見佢之後跳舞都有啲生硬，知道佢忍住痛，好戥佢心痛，但亦覺得佢好堅強。」陳茵媺就大讚基仔好犀利，好欣賞佢嘅堅持。
(蘋果日報)
