尋日（11日）係安志杰41歲生日正日，咁高興當然要同靚老婆、佗緊第二胎嘅名模Jessica C.（JC）齊齊慶祝，加埋兩歲大嘅囡囡Tessa，真係幸福到爆裂！但原來佢哋唔止即將變為「一家四口」，今次仲「一家五口」賀壽添～～
點解咁講？皆因無論係上個月JC生日，定係尋日安志杰生日，安志杰嘅好兄弟伍允龍次次都出現喺佢哋嘅「家庭聚會」之中，仲要毫無違和感，直頭係一家人一樣。
JC一口氣上載咗幾段同老公慶祝生日嘅片去社交網，當中包括Tessa送吻賀爸爸牛一，同埋「一家五口」唱晒生日歌同吹蠟燭，Tessa Sweet爆坐喺安志杰大髀，JC傍住喺隔籬，而伍允龍就企喺安志杰斜後方。片中除咗「一家人」齊齊唱生日歌，伍允龍喺後面又掩面又做晒表情，連JC啜啜安志杰時，伍允龍都冇尷尬，當安志杰對住囡囡話「I love you」時，伍允龍又即刻接一句「I love you all!」
OK！正式宣布佢哋係「一家人」喇！
(on.cc東網)
