古巨基嘅《WE我們世界巡迴演唱會—香港站特別版》，昨晚喺紅館開第二場，不過就發生咗小意外，就唔小心喺台上面跌咗入一個窿，不過十幾分鐘之後，古巨基就出返嚟同大家講冇事，演唱會繼續舉行。
喺9點9左右，Mani出現喺紅館附近出現，講咗一輪電話，面色有啲沉重，行咗一輪之後，就去到香爐位拎咗啲香，點着之後拜咗一陣神就入返紅館入面。
完騷之後12點幾，基仔就同埋Mani一行人就上咗一部黑色七人車離開。而楊受成離開嘅時候，都向記者揮手話：「無事！」12點15左右基仔就同埋Mani一行人去到養和醫院，問到基仔嘅情況點，佢就話：「要檢查下先。」
啱啱佢就喺社交網講解情況：「啱啱去咗醫院檢查，照咗磁力共振，我跌落地個位係頸背下邊，所以就照咗頸背位，啲骨係冇事大家可以放心，醫生講係啲肌肉拉親，所以有少少梗梗哋，但呢個絕對唔影響我嘅演出，大家放心唔使擔心我，聽日（今晚）照舊如常紅館見。」
好彩只係拉傷頸部肌肉，基仔仲話唔會影響演出，買咗飛嘅粉絲們記得今晚去睇騷啦！
(蘋果日報/on.cc東網)
