翁虹噚晚喺灣仔演藝學院為一個舞蹈劇擔任揭幕嘉賓，呢次係佢喺演藝畢業後30年來首次返回母校演出，帶點感觸，翁虹憶起以前有個露天劇場，練舞時望落樓下會見到陳錦鴻同黃秋生排戲。
今次擔任揭幕嘉賓需要跳一節現代舞加芭蕾舞，專登跟老師學習，翁虹話：「同排舞老師好有淵源，老師嘅媽媽係我粉絲，又係重慶人，同我媽咪一樣，大家半個同鄉。今次只係練習咗三、四個鐘頭， 爛船都有三分釘，最初以為自己得一兩分，之後覺得自己應該有三分以上。」
劇團有自閉症兒童參與演出，翁虹認為香港係包容多元化社會，要接納不同群體，面對呢班小朋友要正視，而唔係忽視或者無視佢哋， 作為媽咪好佩服佢哋家長 ，係一個好愛嘅負擔。
母親節，翁虹未能返台灣度過，但就同囡囡提前慶祝，10歲大囡囡劉蒔一早託Auntie在場送上一個海藻啫喱蛋糕畀翁虹，原來呢個蛋糕係一班自閉症兒童參與製作，翁虹看見蛋糕時感動到喊說：「我淚點好低，個蛋糕好靚，靚到唔捨得食。」
(蘋果日報)
