大家晚上有睇大台重播嘅《刑事偵緝檔案2》，應該搵到好多熟悉而又陌生嘅面孔，好似91年新秀李家強，佢就係喺其中一個單元飾演紅星張國強助手，兩人發生斷背情，仲同飾演高敏嘅陳美琪爭仔，之後當然又發生命案啦。
其實該劇仲有一個表面上唔太重要嘅角色，戲份唔太多，橫跨幾個單元，有佢喺度就一定有笑料，但你又未必知道佢叫乜嘢名——佢就係張大勇同父異母細妹張小柔喇！劇中小柔好鍾意唱歌，仲特登輟學、瞞住父親（劉丹）返香港參加歌唱比賽。雖然最後failed，但就近水樓台做咗陳美琪助手，仲係張國強被殺案嘅重要證人。
飾演小柔此角嘅女仔，真名黃悅，大家覺得佢眼熟，除咗因為佢唔鹹唔淡嘅廣東話令人聯想到李綺紅之外，仲有就係佢曾經主持過《閃電傳真機》半年，同埋96年與霑叔黃霑主持過無綫《聯中傳奇》，一齊唱主題曲——「對一對，我哋對一對……」係喇，嗰個對對對對對對對對對對嘅可愛小妹妹，就係黃悅。
九十年代嘅香港影視圈，出現過幾個「竹昇妹」女藝人，有黃悅啦、李綺虹啦、仲有鍾麗緹等等。
關於黃悅嘅資料，實在少得很，年齡都係一個謎。黃悅加國出生長大，母親有四分之一華人血統。四歲踏足藝壇——舞台劇同跳舞，九歲先至正式入學讀書。大學畢業後，黃悅放棄人工唔錯嘅全職工作，隻身來港發展，加入無綫。以黃悅嘅英文程度，黃悅獲安排喺明珠台主持青少年節目，之後再被調去主持《閃電傳真機》，做咗半年，表現出色又有觀眾緣，一口不純正廣東話又有啲傻更更feel，所以冇耐就被派演劇集《刑偵2》飾演陶大宇同父異母嘅妹妹。
96年，黃悅曾接受訪問稱，當初接到《刑偵2》劇本時，即刻Email去三藩市俾佢嘅華人朋友幫手，為小柔設定角色性格小動作咁，之後再學習糾正發音、學運氣同感情，佢仲話自己苦練三個星期先至勉強記到劇本，但大宇同「義仔」梁榮忠「只係望咗一眼」劇本就識背，令黃悅呆咗。
個子嬌小，但黃悅性格強大，為人獨立，又有好奇心，她形容自己仲有一種先驅精神，即使當初隻身來港發展亦毋懼，反而好興奮嘅係凌晨四點仲有成班人唱歌、半夜打開雪櫃食凍雞有幾好味……黃悅仲話，初初來港，覺得香港人係鍾意「先發制人」——有咩都好，鬧定先，黃悅當然好唔慣，但都忍咗先，仲話：「佢哋鬧完一兩次之後，就會慢慢變成我好朋友0架喇！」
以星運嚟講，黃悅真係欠了點運，拍完《刑偵2》同第三輯之後，亦有拍過一部電影叫《夜半兩點鐘》，之後銷聲匿跡。咁黃悅呢廿幾年去咗邊呢？加拿大出生長大嘅佢，原來去咗美國，依家教瑜伽，雖然早生華髮，但輪廓變化不大，有適量皺紋，笑起嚟同當年嘅張小柔仍然一模一樣。黃悅喺自我介紹中，講番06年一次意外受傷，佢未有講明邊度整親，但自言覺得好痛好辛苦，仲覺得自己好無用，好彩當時遇到個好醫生，但都要一年時間先至慢慢康復。
黃悅表示，康復期間，佢開嘗試慢慢郁動身體，亦因為咁而開始接觸瑜伽，一拎到證書就開始喺洛杉磯開瑜伽教室授徒，希望可以幫到有需要嘅人。喺imdb都搵到黃悅嘅profile，身高5呎4，資料唔多，除咗有近照外，仲有三條片，都係黃悅以英語演出嘅片段。
黃悅自我介紹稱溫哥華出世，4歲開始做戲，細個好百厭，成日周圍走，搞到父母要入森林搵佢。黃悅笑言入演藝圈，就係想俾父母知道佢去咗邊喎。
問到大宇同拍《刑偵2》嘅黃悦仲有冇聯絡？佢話：「當年拍完劇，已經冇聯絡喇！」
(蘋果日報)
