吳家樂為大台服務咗長長24年，前年終於憑《城寨英雄》扮演反派「春美哥」上位，喺台慶頒獎禮攞到「專業演員大獎」，可惜依然冇被大台重用！
最近拍新劇《包青天再起風雲》，男主角「包拯」由譚俊彥飾演，張振朗演「展昭」，女主角係胡定欣、姚子羚，家樂只係拍攝其中一個單元《花蝴蝶》。日前家樂喺微博貼同譚俊彥、胡定欣、袁文傑等機場出發相片，見到家樂豎起V字手勢，高高興興飛去吐魯番開工，翌日拍攝又貼造型相，完全冇介意做主角定配角。
點知今日家樂忽然po咗一段文字，似忍無可忍才喺微博留言：「一直以為甚麼的改變也影響不到我的工作態度，做好本分，逆來順受!但原來自己EQ真的不高，能力有限!只好繼續獨來獨往。」
家樂似乎拍攝嗰時發生不快事，觸動咗佢嘅神經，一直以嚟逆來順受嘅佢終於頂唔住，淡出娛樂圈多年嘅李珊珊，見朋友唔開心，亦喺微博力撐好友，叫家樂「別被契弟扯後腿」，珊珊回覆：「阿B，不論情況環境多惡劣，只有眼前路，勇往直前，我會是第一個在旁撐到你最後。義無反顧。現在一劇接一劇的良機，每逢阻你的，遇神殺神遇佛殺佛，別被契弟扯著你的腿，阻礙前進步伐。從來你視你的工作就是生命，記住沒人能破壞傷害它。」
究竟家樂拍攝時同劇組發生乜事呢?傳媒向家樂了解，佢僅以兩字回覆：「謝謝!」
吳家樂噚日喺facebook呻「冇價值，俾人當透明真係好冇癮」，未知係講工作人員定同劇演員!?對於家樂話被當透明一事，問到同劇組嘅姚子羚係咪有事發生，佢回應時就話：「我唔清楚呀！我呢幾日冇佢有同場口。」
(蘋果日報)
