梁詠琪（GiGi）、周汶錡（Kathy）、周麗淇及謝婷婷今晚喺九龍麗思卡爾頓酒店，出席「卡地亞Résonances de Cartier」展覽揭幕，日前剛完成巡迴演唱會嘅GiGi，話已經瞓咗一晚，唞番夠本，重回生活軌道。
佢笑言今晚見到啲金光閃閃嘅珠寶都好開心，問佢係咪好想帶返屋企？佢笑言：「係長遠嘅目的，珠寶係留俾自己小朋友，一路傳承落去，所以一定會揀啲自己最鍾意嘅。」GiGi又透露囡囡Sofia鍾意啲靚嘅嘢，有時見到媽咪啲靚首飾都會摸吓話想戴，但因為GiGi怕整唔見或整爛，所以首飾多數放喺保險箱。GiGi仲話之前同囡囡為雜誌影相，囡囡出主意教媽咪擺甫士，GiGi都有配合，佢讚囡囡似足父母夠高大，有做model嘅天份，佢亦唔反對囡囡做model。
提到GiGi今晚身上珠寶總值1,900萬，問到佢會唔會買嚟送俾個女，佢笑言要賣樓先買到：「珠寶都係一粒、兩粒咁買，實用為主，呢個成層樓咁貴要下一世。」佢話屋企都係傳統啲，買完磚頭先買珠寶鑽石，至於老公Sergio有冇送？GiGi話結婚戒婚嗰啲都有，而o依家過節都已經少咗買奢侈品，都係食餐飯買吓花，鑽石珠寶留畀個女。
嚟緊母親節，GiGi話要幫老公代理嘅童裝品牌宣傳，囡囡唔會跟去，但就會送畫，GiGi話係學校教嘅，好期待收禮物嗰一刻。至於同樣生咗混血B嘅Kathy，被問到有冇約埋GiGi個混血囡囡玩？佢話：「朋友成日想撮合啲女同囝囝一齊玩，（囝囝有冇怕醜？）唔怕醜，佢細細個就有好多朋友。」
Kathy仲爆囝囝鍾意同啲姐姐玩，仲笑囝囝「好猴擒」，佢話：「佢鍾意同啲大過佢嘅姐姐玩，同年紀嗰啲就唔睬佢，啲高過佢、大過佢，（囝囝）就會攬住佢、追住佢同熊抱人哋，有時覺佢好猴擒，仲喺度諗『使唔使咁呀？』佢又鍾意揀啲長頭髮嘅，返playgroup時特別留意啲長頭髮嘅女仔，就會攬住對方，所以我就知佢嘅taste。」
但Kathy話囝囝愛長髮姐姐同自己無關：「因為我都係束起嘅。」問到母親節點慶祝，Kathy話自己以往會拒絕老公送珠寶，但o依家唔會再咁儍：「可能老公都會送吓花，老公好好嘅，有啲咩節日都會識做，揀啲珠寶俾我，但我同佢講，下次可以帶埋我去揀，可能佢知我唔係好鍾意嗰款，叫我自己去換，不過唔敢帶我去，可能驚我揀件仲大件嘅。之前我真係拒絕佢叫佢唔好送，係咪好儍呀？o依家自己鍾意咗，因為少買衫，啲珠寶一來可以保值，又可以配搭，又值得投資。」問佢捨唔捨得轉俾未來新抱？Kathy話：「都係㗎，所以呢個excuse幾好，仲可以叫老公送多啲。」
(蘋果日報)
