做媽媽不容易，至今仍是單身的張慧儀卻為自己選擇一條不一樣的道路！2006年，她在北京經營果醬生意，一次在「平安之家」福利院做義工時，巧遇因患有先天性心臟病被棄養在天橋底而被福利院收留的兩歲的小男孩，因他一聲：「媽！」融化了張慧儀，母子緣由此而生，並為他起名為張晃維。縱使沒有父愛，但她仍盡力給予他一個滿滿幸福的家，經歷高山低谷，默默度過13個年頭。
今年的母親節，對張慧儀別具意義，因可跟一年沒有見面的Hanson共度。由於養子的醫藥費及學費等支出龐大，為「跑數」她忍痛將養子送返馬來西亞家鄉交由媽媽照顧，自己則留港拍劇搵真銀，直至近日才接養子返港共住。
日前她和Hanson接受傳媒專訪，全程充滿愛和暖，除了互餵甜品，Hanson更親手送上愛心卡和朱古力玫瑰花給她，並不忘肉緊的送上愛的咀嘴，氹得張慧儀笑不攏嘴。其實Hanson十分重視母親節，之前已親手砌了一副著名荷蘭畫家梵高所畫的向日葵砌圖給她。
談起過往一年，張慧儀百感交集，她說去年在港拍攝無綫劇《宮心計2深宮計》時，雖然日以繼夜趕拍，但怎忙怎累也心繫養子，有次拍至凌晨時分，雖然累極但未有回家休息，反而駕車到養子昔日上學的地方懷緬作慰藉。
她坦言不願與Hanson再度分開，雖然工作辛苦也覺得值得：「我日後唔畀佢返馬來西亞，唔想同佢分開，身體勞累我都仲可以支撐，攰咪休息囉，希望守護住佢，同埋喺香港睇醫生都方便啲。」
對於養子的醫療費要花過百萬，她解釋：「一切正常情況下，每年負擔醫療、醫藥費都唔過六位數，但如要做手術，就要過百萬，不過最近遇到個教會朋友係心臟專科，免費為Hanson檢查，都慳唔少！」
在收養Hanson時，張慧儀已知他因為先天性心臟病，壽命時刻和時間競賽，但她堅持收養照料，如今Hanson十五歲，就連她也覺得是奇迹：「係呀，真係賺咗！佢係陽光小朋友，由內向變得多嘢講。（健康穩定？）普通啦……只要佢有足夠休息，穩定生活同安全感就較好，以前喺北京住，天氣較為凍就差啲，返嚟南方住就好好多，同埋最主要嘅係，得到媽咪嘅愛，呢個係互相畀大家嘅動力，可以講係一種奇迹！」
張慧儀對Hanson萬分着緊，Hanson也一樣對她着緊，尤其是感情事，原來他曾當「媒人」說要介紹男仔給她認識，令她十分驚奇！
她說：「早排我個仔話介紹個男仔畀我識，我覺得好驚奇，我問佢個男仔係點，點知佢話叫我問婆婆。我聽佢咁講，真係覺得佢大個仔喇！我問佢想我嘅另一半係點，佢話要講故仔畀佢聽，佢咁講我又覺得佢似番小朋友。」她續說就連衣着打扮，Hanson都會過問並施「限奶令」，她說：「佢會望我着咩衫出街，有時會指住我心口，意思係叫我唔好着得咁低，話個心口唔可以畀其他人睇。」
(on.cc)
