在娛樂圈捱足15年，最近憑大台劇跑出，女友一直陪佢捱過低潮，上緊位嘅男藝人冇飛甩同甘共苦嘅女友，日前仲帶女友見家長陪老人家食飯，被讀者陳小姐透過傳媒分享，甜蜜又孝順。
當晚約8點幾，讀者陳小姐話喺馬鞍山嘅酒樓，見到陳家樂同父母食飯：「成枱6、7個人，除咗佢同女朋友之外，其他都係長者，佢幫手斟茶又夾餸，好多人搵佢哋影相，有啲女仔，連阿叔都影，佢出去埋單時，被阿叔捉住佢影相，佢好friendly，擺低嘢同阿叔影。」
憑大台劇《逆緣》跑出嘅陳家樂
家樂喺電話回覆《蘋果》表示：「唔係特別見家長，因為好耐都冇同嫲嫲食飯，其實好普通一個家庭聚會，有人認得我哋合照好開心。」家樂話女友Jennifer同家人經常見面，父母對女友印象好好：「佢哋覺得Jennifer好乖好上進，同埋覺得佢幫到我。」好旺你？家樂話：「佢哋都係咁覺得，不過主要係覺得我冇乜自制能力，有Jennifer喺度就可以令到我成熟啲。」
問到點樣冇自制能力？家樂坦言：「即係啲錢唔知攞咗去邊度用，佢幫我好好咁管理我成個人，我唔知係咪叫大使，係成日唔知使咗去邊，出糧之後又買結他又買相機，因為自己有拍嘢，見到新科技就想買，咁就用多咗啲錢。」女朋友幫你儲錢？家樂自爆：「我要寫報告囉，要每日話畀佢知啲錢用晒去邊度。」女友每日畀你用幾多錢？家樂話：「又冇咁樣去計，佢都知我有時要同朋友、同事食飯，但要知道我用得係啱，普通食茶餐廳二、三百蚊都夠用。」
家樂仲大讚女友好錫佢嘅父母，成日買嘢畀佢屋企人。記者笑佢可以好放心，最難搞婆媳關係冇問題，家樂笑說：「我諗呢個應該唔存在嘅。」問到幾時結婚？家樂表示：「睇吓儲錢儲成點先，o依家首期都未有，努力啦，希望盡快發展人生下一階段。」
女友余香凝Jennifer近年喺電影圈發展順利，上年更踏足樂壇，成績相當不俗！
上年被傳媒在地鐵站拍拖 （資料圖片）
十指緊扣（資料圖片）
（apple daily）
