上月宣佈兩年情玩完，傳出疑衰花弗一腳踏三船，同時暗交另外兩個女仔，噚晚佢喺社交網晒瞓喺醫院病床相，仲寫住「手術禁食」，佢把聲有啲攰：「我個腦有少少偏頭痛，左後腦乸住乸住，好似透唔到氣，醫生建議我照照個腦。。。」
張建聲上月宣佈同「翻版吳千語」陳嘉莉（Kelly）嘅兩年情玩完，傳出疑衰花弗一腳踏三船，暗交松岡李那同34C「籃球界女神」方詠琳，阿聲強調分手不涉第三者，仲話畀人砌生豬肉。噚晚佢喺社交網晒瞓喺醫院病床相，仲寫住「手術禁食」，留言：「冇事嘅，頂咗咁耐係時候找數，係咁易入嚟檢查下副偈換下油咁啦！」
《蘋果》致電阿聲了解，佢把聲有啲攰：「我個腦有少少偏頭痛，左後腦乸住乸住，同埋我瞓覺好大鼻鼾，好似透唔到氣，成日紥醒，醫生建議我照照個腦，驚係偏頭痛引致睡眠窒息症，今朝做完照內腔鏡，等化驗報告。」問到擔唔擔心？阿聲自嘲：「唔擔心，不嬲黐線，黐線嘅人係唔會擔心。」記者話健康好重要，阿聲答：「我都相信健康好重要，但我覺得拍戲重要啲，係咪好九唔搭八呢，我冇事，你放心。」
問到有偏頭痛幾耐？阿聲話：「都唔知係咪單身咗之後變成咁！」係咪掛住Kelly？佢表示：「冇吖，人係有感情動物。分手總要在雨天，咁啱啫，可能工作疲勞啫。」阿聲話今日出得院，睇吓幾時覆診：「希望冇事，唔會突然變SUPER HERO。」
有冇影響工作？佢表示：「冇呀，後日開始放假，老細迫我放，因為嗰日拍嘢，我除咗con拍想場戲去盡啲，老細嚟見到鏡頭內係好睇，但鏡頭外覺得呢條友精神有問題，佢勒令我唞番十日八日，但我唔鍾意休息，呢排囉囉鬈。」
(蘋果日報)
