今年3月披露同拍拖3年多嘅男友翟志榮有結婚打算，點知今日俾《蘋果》率先發現佢入紙申請結婚，佢今日接受《蘋果》訪問表示年初同37歲男友翟志榮有共識，想拉埋天窗，本來打算年尾結婚，但3月尾發現有咗，所以將婚期提前，上周五(4號)秘密入紙。
28歲林芊妤(Coffee)為前TVB小花，離開無綫後反而越來越紅。一向鍾意小朋友嘅佢，今次雖然係意外懷孕，但佢同準老公都好開心，佢笑住講：「我父母同埋佢屋企人都好開心，o依家三個幾月，預產期係11月，已經知道係男仔。」問佢同老公係咪鍾意囝囝？Coffee笑言準老公本來鍾意囡囡，不過呢個係天賜嘅小幸運，所以仔女都好開心。
之前教舊同事胡杏兒瑜伽修身
問第一次陀BB有冇好辛苦？Coffee話：「好好彩，冇乜唔舒服，嘔都無乜，不過就係易攰啲。」佢又話o依家仲有教瑜伽，相信自己有專業知識，知道有乜動作可以做，有乜唔可以做，都問晒醫生，所以都安全嘅，而且覺得女人大肚都可以好有power，唔想好似要個個遷就自己咁，所以上堂教學生，都冇人知我大肚。」
28嵗Coffee練習瑜伽有功，一副好身材，仲喺瑜伽界越來越出名，旗下有好多學生。
問Coffee係咪真係唔會搞婚宴？佢話本來諗住旅行結婚，但有咗BB，可能連旅行都取消，就咁同親友食餐飯就算。問Coffee會唔會停工養胎？Coffee笑言：「唔會，做到BB出世，BB腳頭好呀！好忙，好多嘢做，屋企人都擔心我太勤力，應唔應付到做嘢，怕我好似牛咁做嘢，不過o依家做瑜伽都會自己就住，以前可能出十成力，o依家用一半！」
Coffee與圈外男友Weng決定提前結婚。（資料圖片）
另外，Coffee今日把聲好似有啲鼻塞，佢話有少少病，因為上個禮拜探完朋友同佢嘅BB後就病咗，醫生話孕婦抵抗力冇咁好，但佢話好彩冇發燒。
Coffee今日就算病咗都仲教瑜伽堂。
（apple daily）
