梁詠琪剛完成演唱會，老公Sergio即有新搞作，引入西班牙童裝品牌NANOS來香港，今日喺尖沙嘴海港城開設限定店。好友楊采妮今日義務到場幫手宣傳，大會安排一對孖仔送上鮮花給Charlie，令Charlie十分親切激讚可愛。
Charlie話孖仔現時14個月大，自己忙於鑽研食譜，現階段過緊另外一個人生，作為新手媽咪好多嘢都未經歷過，生命因此完全改變，以前可以瞓到自然醒，o依家唔會。Charlie修哂身狀態唔錯，佢今次返港睇GiGi演唱會同出席今日活動，喺番港逗留三日兩夜就會返新加坡。
Charlie現時一切以囝囝行先，行街購物都係想起寶貝仔，兩子慢慢長大個性有異，Charlie話：「佢哋喺肚裏面已經一齊，做孖好幸福，先天有個伴，即使我唔理佢哋，佢哋自己講完BB話，你咬下我我咬下你，都會笑得好開心，佢哋有時會搶玩具，總之冇流血事件我都唔會干預，等佢哋互相學習相處。」Charlie有感一對孖仔係快樂BB：「哥哥比較定，有觀察力，好有跳舞天份，一聽音樂就隨節奏擺動，細佬就好開心好鍾意食，我老公o依家成日都會爭話阿仔似自己。」
Charlie當新手媽媽上癮，仲話前幾年啱啱結婚會經常煮飯，但係o依家煮嘅係baby food，老公都會幫手食，可能細仔鍾意食嘢，令我好有心機鑽研，佢哋都好刷得。幾時復出拍戲？Charlie話：「唔會放棄電影，但頭一年對小朋友好重要，接少咗好多工作，老公反而叫我接下出面工作，覺得我咁樣好瞓啲，因為屋企乜嘢都關我事，可能小小聲我都會好緊張 。」Charlie母親節有仔萬事足，佢話：「老公話交畀佢負責，我都明白小朋友仲細，父母代勞。」
(蘋果日報)
