袁詠儀(靚靚)今早現身山頂，為「點滴揹水Walk & Run」主持開幕禮，更籌得超過220萬元善款。靚靚已經有一段時間冇跟隨機構進行探訪，但係佢一直希望帶埋阿仔魔童參與，可惜夾唔到學校假期，不過靚靚話本來佢今朝想叫埋魔童一齊參與，點知佢話：「今日係我假期，畀我休息吓，媽咪妳去擔水。」
靚靚話呢個行動令大家明白食水嘅珍貴，所以佢好細個開始，已經限制魔童嘅沖涼時間，連擦牙洗臉都唔會長開水喉。唔知今年母親節佢又會收到乜嘢禮物呢？靚靚苦笑話個仔從來都冇乜表示，呢啲係做嚴母嘅慘處，屋企只係有父親節，唔知老公張智霖又會唔會包包做禮物？靚靚搞笑話：「佢會話妳又唔係我阿媽，不過我都唔係好緊張呢個節日，反而會送花畀媽咪、奶奶，同阿仔啲契媽。」
噚晚喺慧妍晚宴，靚靚留守拍賣環節後先走，唔知佢有冇撞到陳法蓉？佢就笑笑口話：「我都冇尷尬，係你哋講到尷尬。我唔驚，我有個勇字，我成晚不停同李丞責講風水命理相學，另一邊關之琳就講扮靚，成晚都好有得著，兼且人好多，都冇乜機會同其他人打招呼。」
(蘋果日報)
