梁詠琪(GiGi)噚晚喺紅館舉行演唱會，完騷之後，GiGi出席慶功宴接受訪問，佢話好開心見到大家咁有熱情，反應好有力量：「令我好powerful，其實兩場都好滿意，感動地方都唔同。」連續兩晚，GiGi都唱盡廣東歌，仲強調廣東話係母語，不過GiGi話冇特別含意：「我有留意時事新聞，只係覺得難得返到香港開演唱會，對我嚟講更有意義，我強調廣東話係母語，冇乜含意，都係講事實啫！」
提到離世嘅粉絲，GiGi感觸話：「今日先知有個上海fans原本想嚟睇騷，但前一晚病逝，佢跟咗我好多年，每場騷都有睇，聽到呢個消息，真係好心噏，我喺台上係真心講，我好珍惜每個歌迷，真係一個都不能少。《花火》係送畀每個歌迷，頭半場心情沉重，後尾大家反應好，第一晚有70幾個同學捧楊，今晚就有30幾個親戚，真係好感動，其中有個70幾歲長輩，咁大年紀都嚟睇騷，佢去到後台，我見到佢都忍唔住喊，因為好有心。」囡囡同老公睇足兩晚，GiGi大爆Sofia睇完騷之後，心情太亢奮，點幾返到屋企仲要聽兒歌唔肯瞓：「我同佢講，你唔瞓我都要瞓，佢喺鏡頭前好怕醜，其實本身好奔放，成日學我唱歌。」
為咗今次巡迴演唱會，GiGi前後花咗兩年時間去準備同演出，佢直認之後休息要交人兼造人：「我要支持埋老公嘅生意，先可以休息，好好哋造人。」GiGi又大爆囡囡唔肯返屋企：「佢好搞笑，因為我預先講咗，如果睇到半場頂唔住眼瞓，就叫佢返去先，我啲同事話佢抓住牆死都唔肯走，話要等埋媽咪。」
會唔會帶埋囡囡上台一齊唱歌？GiGi笑話：「唔好叫我擔心多樣嘢啦！又要顧住佢嘅情緒，我會唔夠專心。做咗兩年巡唱，每逢周未，Sofia都會問我係咪開演唱會，佢以為媽咪嘅工作就係開演唱會。」GiGi計劃生完第二胎之後，再諗開演唱會part 2嘅問題。
(蘋果日報)
