靚靚表示，自己除咗當選那年有參加過之外，廿幾年都冇參加過，佢話：「覺得多女人嘅地方，是非一定多！」問到靚靚見到佢時可會感到尷尬？靚靚話：「點解要尷尬呀！我面皮咁厚。」
90年港姐冠軍袁詠儀(靚靚)昨晚都有到灣仔君悅酒店，出席「2018慧妍雅集36週年慈善晚會」，着西裝嘅靚靚到場時，楊婉儀就上前迎接，之後佢就同朱玲玲、王愛倫、趙雅芝、劉倩婷等人合照，靚靚表示，自己除咗當選那年有參加慧妍雅集活動之外，廿幾年都冇參加過慧妍嘅活動，佢話：「覺得多女人嘅地方，是非一定多！」
兩年前梁小冰因為出席慧妍活動，因為一件外套與陳法蓉發生爭拗，問到靚靚今次嚟係咪撐小冰，靚靚就話唔係：「只係之前喺一個場合認識到Sandy(劉倩婷)呢個小師妹，其實都叫過我嚟呢啲慈善活動好多次，好多時都推咗冇出席。呢個小師妹叫我嚟一次，睇吓慧妍啲慈善活動係做啲乜嘢，所以今晚就嚟。」
記者講笑話係咪踢佢入會，靚靚聽到就話：「踢唔到，o依家除咗老人會之外，咩都踢唔到我入會㗎喇！總之係嚟支持小師妹，因為見佢哋為慈善好努力。」問到見到陳法蓉時可會感到尷尬？靚靚話：「點解要尷尬呀！我面皮咁厚。」追問有冇約埋梁小冰嚟？佢笑笑口答：「咁佢仲係唔係呢個會先，其實冇乜所謂啦，為咗慈善都冇乜所謂。」
(蘋果日報)
