麥明詩疑遭魏焌皓「強吻」事件愈鬧愈大，有傳指魏焌皓「花底」，遭多位女藝員投訴行為不檢，無綫有感事態嚴重，將他炒魷。
不過，魏焌皓原來都係「花底」，另有報道指除咗麥明詩之外，佢亦曾遭多位女藝員投訴「行為不檢」，好多人拒絕再合作，令唔少監製都唔肯起用佢。無綫亦有感荷李活「#Me Too」反性侵席捲全球，對旗下職藝員嘅紀律好重視，為咗唔想有女藝員受到傷害，無綫決定同魏焌皓提早一年解約。而香港討論區都有熱烈討論呢單新聞，有網民更翻出去年9月，有「翻版陳妍希」之稱嘅前TVB小花陳潔玲接受商台節目《公子會》訪問時，大爆自己喺TVB見過最「人渣」嘅男人，當時有人估係吳業坤，但網民就覺得魏焌皓先至啱。
當日陳潔玲喺訪問中話﹕「有一個case，係我哋一班女藝人傾傾下，發現原來佢(某男藝人)追過你喎，又追過佢喎，又追過呢個喎。(追過好多人？)係喇，佢每一次都會用一故事，就係佢受過情傷，當自己係一個受傷嘅小白兔。講到自己其實係專一，好追求愛情咁，跟住我哋大家拎返出嚟講，就覺得點解個個一樣。」陳潔玲形容呢位男藝人說話技巧高，令好多女仔都會同情佢，佢話﹕「例如講啲佢以前嘅經歷、童年、屋企慘事咁。但嗰陣坊間已經對佢有負面嘅印象，佢反而會用返呢樣嘢，用返佢自己真實嘅版本，即係佢自己先係畀人辜負嗰個，佢會講佢自己受過一次好重嘅情傷唔敢再去愛人，但遇到你就重生。好好彩，啲編徒呃唔到你就會好快去呃第二個。」
《蘋果》今日打電話問當時人，問到「人渣」係咪指魏焌皓？陳潔玲話﹕「哦，哈哈，冇呀，嗰個訪問，我唔係好記得，因為太耐。(唔係講佢？)呀….嗰個節目冇指名道姓，我諗都唔方便講邊個。」有冇留意有傳麥明詩遭強吻？佢話﹕「我冇follow，現在唔喺香港。」佢承認與魏焌皓有一齊合作過，但私下無來往，問有冇追過你？陳潔玲話﹕「冇，同佢唔係好熟，離開無綫後都冇聯絡。(信唔信佢係呢啲人？)我要睇番新聞先。」
無綫高層樂易玲回覆東網稱：「其實每個藝員都係TVB一份子，我哋係唔會輕易放棄，但今次呢件事，冇人向我投訴，但我有喺製作部門聽過，係有監製唔肯用佢，所以我有了解過，知佢（魏焌皓）對每件事都有自己睇法，既然佢同其他人合作上出現問題，而佢想法又唔適合公司制度，咪唔同佢續約，等佢喺出面有另外發展！」
(on.cc東網/蘋果日報)
