現年38歲嘅佢喺15年生咗大女，o依家就佗緊第二胎，將會三年抱兩，今胎都已經有近8個月大，近日仲有出吓活動，雖然已經係巨肚但依然活躍。
日前《蘋果》就見到佢喺港島區南灣出現，似開緊工，身邊有3、4個攝影團隊，仲換咗件黑色比堅尼，披住件紅色晨褸，踢住人字拖，由一名女助手緊隨護駕落樓梯。
混血名模Ana R.呢胎明顯比生第一胎體型巨變，着住比堅尼上圍固然澎湃兼巨肚，肚臍更凸凸，好似隨時生得咁，Ana一邊落樓梯，左手就下意識摸住個肚做保護。
原來Ana行去沙灘方向匯合工作團隊，原來兩歲幾大女Maya都有份開工，但可能天氣熱，Maya就扭計，坐喺媽咪大髀到又喊又要食奶嘴，搞到女助手要幫「小主人」拭淚，而Ana又要拎糖同生果安撫囡囡情緒。
氹咗囡囡一輪，Ana見佢心情有啲平復收晒聲，就抱佢去沙灘埋位，好有耐性同佢玩咗一陣沙，之後就開始拍攝，攝影師就要求Ana跪喺沙度，而Maya就自動波錫錫、摸摸同攬攬媽咪巨肚，而Ana又雙手抱起Maya錫錫，相當溫馨。二人影咗一陣，Ana就叫助手畀水囡囡飲，佢就同攝影師睇playback同畀意見，之後再埋位影母女手拖手等構圖。Ana畢竟係專業模特兒，影咗一個鐘就完成拍攝，離開時就穿返藍色碎花裙，帶埋囡囡揸車走人。
事後，《蘋果》就搵過Ana經理人，佢話今次拍攝係Ana自己搵攝影師影孕婦寫真留念，笑佢好母愛犯濫，好享受做媽咪同陀B，問到佢幾時生得，佢就話預產期喺7月頭，呢胎都會喺香港生，由於第一胎係開刀，今次都唔例外，但就唔會擇日生，問到Ana已否停工準備生B，佢就話佢o依家好精神，同埋夾埋湊女時間，仍然可以出席活動嗰類較輕鬆工作。講到佢身體狀況，經理人就話因為肚已好大，佢就成日尿頻要去廁所。
Ana R.同大女Maya
(apple daily)
