藝人麥明詩（Louisa）、馮盈盈、陸浩明與十多位KOL到觀塘apm商場出席節目《#後生仔傾下偈》傾吓傾吓傾到100集Gathering活動，對於有指魏焌皓拍攝劇集《使徒行者2》時對Louisa行為不當，再度成為新聞人物的她，一到場即顯得神色凝重，受訪前頻頻撳手機。
Louisa接受訪問時說：「我有留意報道，但我唔想講嘅嘢引來冇根據嘅揣測，加上我一貫宗旨，唔想引起網絡公審。」
問到與魏焌皓是否合作愉快？她說：「成個劇組都合作得好好，觀眾都好鍾意我哋呢條感情線。（知佢離咗巢？）今日睇新聞先知，每年都有同事離開去其他地方發展，嘗試唔同嘢都好，希望佢順利。（事件經常發生你身上？）首先我唔再回應喇，呢啲事影響好多女性，我身邊朋友都有經歷，唔希望未審先判。」
有好姐妹馮盈盈陪住！
據可靠消息透露，事件還另有內情，指魏焌皓曾遭多位女藝員投訴並拒絕再合作，令不少監製都不肯起用他，此事上報到無綫管理層，無綫有感荷里活「#Me Too」運動反性侵席捲全球，對旗下職藝員之紀律亦十分重視，為了不想再發生令女藝員受傷害事件，無綫決定跟魏焌皓提早一年解約。
魏焌皓
他接受訪問時強調，並沒有強吻及追求過麥明詩，他謂：「一定冇啦！」問到為何有此傳聞時，他說：「我都唔清楚，我之前都有傳過訊息畀佢，同佢講一啲唔真實嘅嘢，希望唔會係喺佢把口講出嚟！希望大家互相尊重，唔好有造謠者！但係佢冇覆過我。」
談到此事對他形象有很大影響，魏焌皓謂：「我冇諗咁多，我只想拍戲，唔想搞是搞非。」而他表示已離開無綫半個月，本來還有一年合約未完，但公司要求提前完約，問為何要提前完約，他說：「唔知喎！（公司無解釋？）真係冇講原因。」
事件愈鬧愈大。（資料圖片）
（on.cc）
