「我入咗行就快20年，喺72行裡面，我都飾演過好多行業，好似的士佬、仵作佬、衙差、警察、蠱惑仔、黑社會大佬、外星人到賤男等都做過。以前啲朋友我做Marco，最近就因為一架的士，啲朋友又改口叫我做Seven。不過喺一個地方差不多20年，我覺得係時候要落車睇吓外面嘅世界。」
「我叫趙永洪，但係其實叫我做乜都無所謂，希望大家下次見到我，唔會剩係記得我叫Seven或者Marco，仲會記得我之後更多更多嘅角色。」一段簡單嘅獨白，係趙永洪離開無綫後嘅心聲。喺99年無綫藝員訓練班出身、粗略估計由入行到o依家拍咗超過100套劇集嘅趙永洪，本來一直做開大配角，直到處境劇《同事三分親》、《天天天晴》、《畢打自己人》之後，總算令事業上試到啲甜頭。喺09年嘅《萬千星輝頒獎典禮》被提名飛躍男藝員，角色上亦都開始多咗發揮機會。
直到近期《降魔的》嘅的士司機「些粉」，更令觀眾加深咗對趙永洪嘅認識。不過，趙永洪喺呢個時候決定嚟一個轉變，就係離開呢個工作咗接近20年嘅地方，向外發展。趙永洪接受《蘋果》訪問，回想呢20年嘅生活，佢話：「其實呢20年對我嚟講，係一個好好嘅訓練同經歷，我本身係一個好鍾意演戲嘅人，有機會可以俾我演戲，我已經覺得好開心，我自己做過好多唔同嘅角色，睇咗好多師兄師姐、前輩嘅戲，喺同佢哋嘅傾偈過程，有好大得著！」
當日離開消息一出，有唔少網民都覺得趙永洪欠嘅，係一個機會，佢聽到之後都覺得好開心，多謝大家一直對佢嘅支持，之不過有讚當然有彈。難聽嘅說話，趙永洪話當然聽唔少：「我試過搭地鐵，有一個5、6歲嘅小朋友，嗰陣佢指我住我話明星呀，佢阿哥就話：『明乜鬼嘢星呀，茄喱啡嚟啫！』當時我真係唔知俾乜嘢反應佢，覺得塊面好熱，但係又冇理由怪佢喎。」趙永洪續道：「事後我知道好多觀眾都會係咁，佢唔係專登話你，只係唔記得你個名，所以咪統稱你做茄喱啡。不過好開心亦都好彩，《畢打》之後多人知道我叫Marco，嗰個感覺都好開心，連mo姐(毛舜筠)都話我，叫乜鬼Raymond呀，不如叫Marco喇，啱晒我呀！」
「如果你問我，我反而覺得生活好多姿多采，因為每一日都會面對唔同嘅人同事，拍好多唔同嘅角色。每個演員條路又唔一樣，好多嘢都積少成多。有啲人一出嚟就做主角，但係我好清楚有好多嘢係要我自己慢慢儲番嚟，慢慢去搵機會。」
講到機會，趙永洪就說：「我自己覺得都算多，日日都有工開，真係冇乜點停過，19年半都爆騷！你當我阿Q精神，一直以嚟諗法都好正面，唔會覺得有啲乜嘢遺撼，反而覺得自己累積咗好多演出經驗，呢一樣嘢係好實在，我嘅心態都好正面，就算做邊一行都係一樣，如果你唔鍾意呢份工，要你坐喺寫字樓，坐足一日都搞唔掂，實在冇辦法可以繼續支持，演員係我一個好鍾意嘅行業，所以我有信心。」
因為有呢個信念，所以佢一直都冇過放棄：「堅持係好重要概，好多人話做戲嘅人係傻嘅，睇戲嗰啲係癡嘅，人生如戲，戲如人生，既然選擇得呢個行業，都要對自己負番個責任，我都唔知自己一試就試咗20年，我暫時嘅心態都Keep到！」
(蘋果日報)
