鍾欣潼（阿嬌）今日喺金鐘為英國品牌BORA AKSU活動擔任嘉賓，大會為阿嬌送上兩幅肖像。
提到佢本月25日將到美國舉行婚前派對，問佢籌備成點？阿嬌誤會記者問佢婚禮搞成點，即強調唔係結婚：「我個人去參與就得，唔使搞咁多嘢。其實我都唔知叫咩派對，總之係朋友聚會。」咁派對上會唔會有狂野男舞蹈員表演先？阿嬌自嘲會怕醜：「我唔係玩得好癲，我玩唔起，想像唔到個畫面，有朋友提議過，不過我覺得好尷尬，我未見過世面。」
阿嬌仲透露28號係未婚夫賴弘國生日，所以未婚夫都會同行慶祝，又笑指會安排火辣女舞蹈員作賀禮：「我唔會送自己囉，我幫佢call定dancer，一定要靚，一定要好身材。」如果到時辣妹埋未婚夫身呢？阿嬌話：「我接受唔到。」雖然阿嬌講笑唔會送生日禮物畀未婚夫，不過佢自爆未婚夫喜歡十多年嘅舊款金手錶：「係全新，但係舊款，不過我覺得唔抵，等我諗下先啦。」至於婚紗揀左未？佢就話自己唔心急：「去美國會影（婚紗相），不過未揀裙。各式各樣都試下啦，借架啫。」
（apple daily）
