18歲「小龍女」吳卓林與30歲外籍女友Andi，日前透過YouTube求助，稱因為雙親恐懼同性戀（homophobic parents），佢哋求助無門，流落街頭1個月。小龍女一開始講話，就稱自己係成龍女兒，加上全程講英文，引起國際主流媒體注意，包括美國《時人》、英國《每日郵報》、英國《太陽報》、日本《日刊體育報》等陸續報導。
《時人》報導內容，都有重述卓林於3年前一個訪問中，曾經講過唔當成龍係爸爸。卓林當時話﹕「他從未存在於我的生命，我絕不會把他當成父親。我不會說他是我爸，我只會說，喔，成龍，一個演員」。報導亦有提及卓林去年喺IG出櫃示愛，並指吳綺莉對於女兒嘅控訴，回應係「去搵份工作」。
成龍係國際巨星，在唔少外國人眼中成龍係超級英雄，各地都有好多粉絲。唔少網友看過報導後，都批評卓林利用成龍名氣，有日本網友指「結果還是利用成龍的名氣」，「既然認為沒父女關係，就不應自稱是成龍女兒」，「是為了錢吧」。
英國《每日郵報》網站大部分網友留言，「去找工作吧」，「希望她能自食其力」。對此，成龍至今仍未有公開回應。
(蘋果日報)
