任達華同琦琦嘅13歲寶貝女任晴佳(Ella)，日前同媽咪去咗首飾店睇母親節禮物，原來佢哋成日一齊行街shopping，琦琦都好享受同Ella嘅親子時刻，問到Ella往年母親節會準備啲咩，Ella就話會買花、寫張母親節卡同親手做蛋糕或者朱古力曲奇俾媽咪，而琦琦開心指囡囡送咩俾佢都好，就算係一支花已經好開心，琦琦大讚Ella係一個乖巧文靜嘅女仔，平時唔多嘢講。
當日Ella身穿短褲盡顯遺傳媽咪嘅一雙長腿，喜歡嘅首飾以簡單為主，佢又話生日時，爸爸媽咪都有送一啲鑽飾，但Ella只會收藏。
問到今年母親節有咩活動，Ella就話同爸爸、媽咪、嫲嫲、婆婆一齊食飯，享受三代同堂嘅天倫之樂，琦琦笑言：「對我嚟講每日都係母親節。」Ella向住琦琦講：「媽咪，I Love you。」
(蘋果日報)
