藝人周家蔚（Janet）為創世電視母親節特備節目《當家好媽》擔任嘉賓，接受主持人葉家寶訪問。她表示在大仔5個月大時第一次過母親節，當時已經好感觸，到細仔現在3歲，比以前還更感觸，覺得自己好犀利，可以湊大兩個化骨龍：「佢哋有時幾難搞，有兩樣嘢頂唔順，就係會爭玩具，但依家已經唔會插手，等佢哋學識自己處理。」她笑指另一個問題就是兩兄弟平時會在車上鬥嗌，自己惟有慢慢教，覺得這個是他們的溝通方式，有時哥哥會特登激嬲弟弟，令弟弟忟憎：「我都要慢慢去拆局，點樣令細佬脾氣好啲，不斷都有新挑戰。」
問可有向老爺洪金寶請教教子心得？Janet笑言：「佢唔會教我啦，依家假期兩個小朋友去咗爺爺屋企瞓，而天明去咗馬來西亞，諗住自己可以安樂瞓個好覺，點知半夜要起身拍蚊。」她指平時4人同住一間房，兩個兒子在半夜會郁動，故睡得唔好，同時與老公鮮有機會二人世界：「係間唔中兩個仔去爺爺度先有機會，不過佢哋都好鍾意，有晒裝備喺嗰邊，一去兩個都要去，其實佢哋愛大家又恨大家，有時分開咗會好寂寞，會互相記掛對方。」
談及日前弟弟三歲生日，問哥哥有何表示？她笑言：「哥哥喺出面對佢係好溫柔，會炫耀自己有細佬，但番到屋企就另一樣嘢，其實佢好錫細佬。（想生個女中和吓？）都驚生咗個刁蠻公主，但都想生個豬女，期就好易夾，視乎呢個時候適唔適合生多個，驚到時會忽略咗二仔。」
（on.cc）
