李嘉欣今日以「愛彼女皇盃大使」身份現身沙田馬埸，並為盃賽擔任頒紀念品予勝出騎師，黎明榮升為爸爸，嘉欣表示已送上短訊祝賀，至於會否想親自探BB，佢話：「 當然想見佢嘅大製作，但要等爸爸媽媽安頓好先。」老公許晉亨是馬場常客，如果夫婦兩人一齊到沙圈觀看馬匹時都會交換心得，當然今日想第二埸二號老爺馬匹”翔惑”勝出(賽果是季軍)。
賭馬上夫妻會唔會有牙骹戰，李嘉欣指每逢兩人為名下馬匹衝線打氣時感覺特別甜蜜，而拗撬只會喺生活上，佢苦笑話：「教導囝囝時，我不幸被編入惡人谷，不過無法，怕佢無人驚，反而毁咗一生。」講到教仔招數，佢指先會瞪大雙眼，尤其喺街外會怒目而視，令囝囝知道犯錯後果，問到係唔係主要喺教導功課上發生，佢指功課交給他人負責，免得母子之間每日爭執傷感情，佢主要教導禮貌品德，問到係唔係有效？佢話：「我覺得唔失禮，當然有失禮部份，我盡咗力，會繼續努力。」
屋企人最近養咗猫狗，嘉欣覺得令囝囝更有責任感，佢話：「啱啱做咗絕育手術，佢都會好擔心，見到貓貓戴住頭箍都會好擔心問，令佢學識關心人同關心動物都一樣，係一件好事。」
（appledaily / on.cc）
