「當時我哋去日本旅行，佢好神秘咁帶咗我去一個沙灘，嗰度有一間白色教堂，然後佢就拎花同戒指出嚟向我求婚，我當時感動到喊於是就應承咗。我哋拍咗唔夠一年拖，都算係閃婚。」問到其實係咪雙喜臨門？佢哋就話。。。
馬嘉均(馬仔)、黃榕同鄭伊娜等主演嘅舞台劇《人性遊戲》，晚上喺西灣河文娛中心劇院公演，首次擔正做男主角嘅馬仔同黃榕接受訪問時表示，劇中會同黃榕有兩場色慾戲份，佢話：「我會淨係著平腳內褲，所以呢段時間好緊張，不停操Fit自己。」而黃榕就話會以內衣上陣。
同劇嘅鄭伊娜早前趁愚人節喺網上公佈婚訊，但就講到似是而非，晚上佢同男友潘敬祖一齊現身接受訪問時就直認：「真係即將結婚，當日喺網上寫嘅時候因為仲未決定點樣通知大家。」伊娜透露上月接受男友嘅求婚：「當時我哋去日本旅行，佢好神秘咁帶咗我去一個沙灘，嗰度有一間白色教堂，然後佢就拎花同戒指出嚟向我求婚，我當時感動到喊於是就應承咗。」
依娜稱求婚鑽戒好靚，色澤好好，不過唔記係一卡定兩卡重，而婚禮將定喺今年底舉行，佢話：「到時會喺沖繩行禮，遲啲先會再返香港補擺酒招呼朋友傳媒，但具體細節仍諗緊。」問道男友潘敬祖同依娜拍拖幾耐？ 佢話：「我哋拍咗唔夠一年拖，都算係閃婚。」其實係咪雙喜臨門？佢哋即刻否認：「唔係，我哋都鍾意BB，不過唔係依家，會慢慢順其自然。」
(蘋果日報)
