仲記唔記得《男人一生，只為尋覓一個肯同自己捱麥記嘅女人》呢篇網絡潮文？但係呢家要改寫成《男人一生，只為尋覓一個肯同自己捱麥記慶祝結婚周年的女人》，個個聽到都會覺得唔係啩，結婚周年食麥記？但真係有咁嘅女人，佢就係陳琪！
尋日（27日）係佢同胡諾言（胡仔）結婚9周年的大日子，但係因為胡仔要開工而沒有任何慶祝活動，到胡仔收工的時間已達深夜時份，大多數餐廳已閂門，只剩下麥記，兩人惟有在麥記歎漢堡包，更拍下一張結婚9周年合照，胡仔喺社交網留言表示：「收工已經係深夜時份！食乜野（嘢）無所謂，最緊要係同邊個食！」
陪老公開工做小粉絲
以為就係咁簡單？原來唔係，陳琪原來一早就入咗電視城陪老公開工做跟得老婆，喺佢陪老公開工時佢就連發兩篇文章，佢話：「9週年嘅慶祝活動，沒有花，沒有燭光晚餐，沒有驚喜！……不過我可以陪伴佢在工作中渡（度）過，我知道男生總是將工作放第一位。我可以做他的小粉絲，在現場支持他，是我最大的幸福。」
陳琪仲話：「9年前嘅今天我正式成為大家認識嘅胡C9，我喜歡呢一個稱呼，感恩一個傻佬肯娶我做老婆。老公成日笑我唔夠完美，我就會同佢講 ： 你自己揀嘅，唔關我事……不過我知道再俾老公揀多次佢都一定會揀我。」相信胡仔睇到一定冧到爆，佢都覺得自己冇揀錯老婆。
(on.cc東網)
