選美出身嘅39歲廖碧兒（Bernice），入行18年戀事多姿多采，先後同劉愷威、陳豪拍過拖，跟住又同李澤楷表弟林忠豪傳緋聞，不過都係無疾而終，直到今年3月有《蘋果》讀者遇見Bernice與型男蜜遊芬蘭，事後呢位型男被起底，原來男友叫盧啟賢（Calvin），係一位失婚富二代，同前妻育有一女，當時有報道指Calvin認識廖碧兒嘅時候，身邊已經有一個泰籍女友Nina，不過Bernice出席活動承認新戀情之餘，亦否認自己係第三者，仲話男友係單身。
有消息指Calvin做投資生意屬隱形億萬富豪，其家族生意龐大，喺中港、新加坡、印尼、英國及加拿大均有物業，連楊紫瓊都係佢客戶，早前更被指在法國豪擲兩億歐元（約19.3億港元）狂掃香檳，日前又有讀者指Calvin喺蘭桂坊開party，除咗以逾50支價值約6千蚊嘅香檳出嚟宴客，玩得好high嘅Calvin仲同唔少靚女埋身影合照。
噚日《蘋果》又收到讀者黃小姐報料指，Calvin與Nina拍咗拖7年，雙方從未分手，身邊朋友亦形容廖碧兒係第三者，黃小姐表示：「Nina一直都係正印，佢同Calvin感情好好，Calvin亦啱啱先陪Nina去完泰國，佢哋兩家人都好close，所以唔明點解廖碧兒會講自己係Calvin女朋友。」
黃小姐又稱Nina有向Calvin了解：「唔知Calvin講咗乜啦，Nina都信佢。」黃小姐又話：「Nina係泰國華僑，佢屋企好低調，但為咗呢單新聞，屋企人都覺得好煩，Calvin都唔想好似俾人起晒家底咁。」
雙方家庭對近日嘅感情新聞感到煩惱，怕令Calvin形象轉差，黃小姐又指日前蘭桂坊party的相片，都係Calvin嘅同事。黃小姐亦透露身邊有朋友見過廖碧兒，不過Calvin同佢只可以話係close嘅朋友：「唔會無端端問人知唔知Calvin有女朋友，但咁多新聞出咗，佢點會唔知？總之一班朋友都係想幫Calvin同Nina，唔想佢哋生活受影響，又成日俾人跟。」
(蘋果日報)
