試過喺頒獎禮拎唔到獎，於是乎喺好失望嘅情況下，忍住眼淚離場，點知俾公司鬧佢唔尊重場合，結果喺種種壓力下，令佢感覺違背咗自己嘅真實個性，最後決定勇敢踏出一步，主動向公司提出解約：「呢個係我第一個為自己決定嘅主意，當刻好堅持，勇敢保護自己感受。」
喺80年代出道，憑《從不喜歡孤單一個》而走紅嘅彭家麗，早前接受梁梓禧喺有線嘅節目訪問，分享入行多年嘅心路歷程，彭家麗話當年出唱片做歌手係佢人生第一份工作，但係因為本身性格唔識溝通，令到佢受盡功壓力，佢話：「我唔識同人傾偈、溝通，好大壓力。喺台上開心，但一返到後台就流眼淚，享受唔到個過程。」
嗰陣佢覺得自己雖然付出一百分努力，但係冇乜回報，彭家麗話佢試過喺頒獎禮拎唔到獎，於是乎喺好失望嘅情況下，忍住眼淚離場，點知俾公司鬧佢唔尊重場合，而且仲因為有唔少歌手都用各種招數搶風頭，結果喺種種壓力下，令佢感覺違背咗自己嘅真實個性，最後決定勇敢踏出一步，主動向公司提出解約：「呢個係我第一個為自己決定嘅主意，當刻好堅持，勇敢保護自己感受。」
嗰陣佢由歌手變咗做歌唱老師，不過喺04年被扑頭打劫，幾乎令佢冇咗條命，佢話：「因為頭骨破裂，我嘅小腦有個兩吋長嘅傷口，呢個意外令到我嘅記性同組織能力變差，不過我覺得可以執番條命，令到我識得知足常樂，樂觀接受事實。」
至於感情方面，彭家麗當年本來已經計劃結婚，不過最後「婚」訊變「分」訊，彭家麗話：「分開係因為唔適合，對方係Mr Right嘅話，停一停、諗一諗都可以。有問題唔係問題，唔處理先係問題，不過我對感情仲有希望，希望遇到一個令自己開心嘅人。」
(蘋果日報)
