「翁靜晶12歲時，嘉玲是18歲。靜晶53歲時，嘉玲是52歲。試找出嘉玲年齡增長的方程式。」劉先生喺大埔Group出題。識唔識計？
呢個問題，其實係翁靜晶問起先：「嘉玲明明大我幾歲，今天竟然比我細了一歲，咁奇怪都有？」又真係奇怪嘅。翁靜晶喺fb仲話，自己12歲嗰年，喺劉芳剛導演家中見過嘉玲，當時嘉玲已經係大人。翁靜晶報稱今年53歲，劉嘉玲報稱52歲。花生友睇完翁靜晶個post之後，齊齊估究竟劉嘉玲「應該」幾多歲。有人估係59，有人話係58。
劉嘉玲、容祖兒、吳千語、馬天佑、周麗淇、樂基兒（Gaile）、李佳芯及黃翠如等喺中環ifc出席化妝品牌活動，同場還有兩位準大肚名模Ana R.同Jessica C。對於翁靜晶質疑佢報細歲數一事，嘉玲笑笑口解說：「其實我唔知根據咩資料話我報細咗，我印象中佢係一個好叻女仔，佢應該有晒資料。佢係律師嚟，唔應該睇錯呢啲嘢，如果我係58歲，我媽15歲應該生唔到我，我係1965年12月8日生日，翁靜晶係唔係應該大我一歲？」
翁靜晶透露12歲時喺劉芳剛導演屋企見過嘉玲，嘉玲當時已經係大人，對此嘉玲就再笑言：「我唔知邊個報錯年紀，不過我喺劉芳剛老師時候係17歲，我係80年嚟香港，82年考藝訓班。」對於網民讚佢越來越可愛，佢就話自己保持一份童真，尤其懷抱大自然的時候。
問到會否同翁靜晶對質，嘉玲就表示唔使：「呢啲我冇報細，我媽咪係1944年，上網一撳就知冇我呃，我o依家好健康，好開心，慢慢老，我唔驚老，會更加注重健康。我會變成一個滿頭白髮，好多皺紋老太婆，我同佢唔熟，佢早我少少拍戲，我讀藝訓班佢已經好紅，拍緊《荳芽夢》。我啲記性麻麻地，不過生日就記得，可能我keep得比佢想像中後生，覺得自己賺咗6、7年。」
(蘋果日報)
