江若琳同未婚夫蕭潤邦(Oscar)今日喺深水埗出席正宗上海生煎皇后麵館開幕，老闆娘江若琳一早到場招待好友，吳日言、小肥、王宗堯、JW同男友葉韋彤(Tarzan)等撐場，李家鼎都有嚟祝賀，新店開張有舞獅採青環節，當拉開蓋住店牌嘅紅紙嗰陣，Oscar輕吻咗江若琳一啖，場面溫馨，店內當眼位置掛上書法牌匾對江若琳意義重大，由現居廈門嘅八十幾歲嘅爺爺為佢親手寫。
未婚夫蕭潤邦同江若琳
一對新人接受訪問時，江若琳講起頭先揭幕時覺得又感動又開心，差啲喊出嚟，身旁嘅Oscar就話：「叫咗佢唔好喊，所以錫佢一啖，鼓勵下佢。」至於店內書法牌匾，江若琳話：「爺爺已經眼又矇、手又震都專登寫咗呢個牌匾，由爸爸專登去廈門拎返港。」
問到新店股份點計，Oscar笑住望一望江若琳，續道：「我同佢邊有分你我，希望半年內可以再開多一間麵館。」現時二人已有八、九間食店，包括之前開咗嘅生煎包店，目前搵緊舖位，想做到有生煎包店就有麵館，主攻新界區，因為新界區啲人比較有人情味。
李家鼎同盧覓雪都有到場支持！人氣超強呀！
江若琳嚟緊就搞婚禮，亦坦言未有打算今年生BB，點知Oscar插嘴：「今晚要好好慶祝下。」暗示火速造人，江若琳即笑言：「吓!嚟緊結婚喇!俾我靚啲啦!」Oscar講笑指有啲肉地會靚啲，而Oscar又指今日好似「婚禮上集」，因為有好多親友到賀。
蕭潤邦希望半年內再開多一間麵館 。
Oscar稱呢間店係由一個爛地開始，由江若琳一手一腳去籌備，由地板、裝修到菜式都係由佢諗，由於二人都鍾意食麵，之前周圍試食，所以構思開麵館，講到店內賣低糖珍珠奶茶，江若琳稱本身鍾意飲，一早去咗學師，Oscar玩踢爆：「佢低糖極都係甜。」
（Apple Daily）
