藝人苟芸慧在中環出席護膚品代言人簽約儀式，她穿上一襲紅色長裙，加上手上戴着三卡的求婚鑽戒，加倍明艷照人。
苟芸慧將與陸漢洋（William）結婚，但婚期一直保持神祕，她笑說：「我都唔知幾時，因為全部都係William安排，佢直接同我經理人度期，依家工作去到10月尾。（11月結婚？）我都唔知，佢唔想我擔心，呢一樣都係佢sweet嘅地方，佢鍾意畀surprise我。（幾時影婚紗相？）稍後會去紐約為雜誌影婚紗相，但係自己嘅婚紗相就未知。（樣樣都唔知會唔會好緊張？）可能我份人都係乜都唔知，呢個都係好事嚟，令到件事好有神秘感，我鍾意神秘感，感覺得好浪漫。（會唔會覺得唔實在？）唔會，好似求婚都係唔知，但係一樣都覺得好浪漫，自己好鍾意。」
心情大靚
苟芸慧早前被拍得與陸漢洋到上水古洞雙魚河鄉村會所，疑似視察婚禮場地，苟芸慧笑言：「佢嗰日係話約咗朋友去飲茶。（鍾唔鍾意場地？）環境幾好，自己都鍾意有陽光大自然嘅地方。（香港擺酒？）自己希望多倫多會擺一次，因為我屋企人喺嗰邊，長輩年紀大唔想佢哋飛來飛去，如果佢香港屋企人多，香港都可以，大家一齊開心吓。」
做定皮膚護理
苟芸慧指會多做皮膚護理，保持最好狀態為結婚做準備。苟芸慧的姊妹團包括鍾嘉欣、李亞男、岑麗香、王君馨等，她笑言姊妹也趕生BB，她們到時佗B出席，會令她顯得更加瘦。
不過無論苟芸慧肥還是瘦，陸漢洋都一樣超愛她！
(on.cc)
