萬眾期待嘅電影《復仇者聯盟3：無限之戰》喺噚日正式上晝，一班Marvel迷梗係排隊入場睇戲喇，噚晚有唔同嘅特別場，邀請咗圈中人出席，大家入場前後都喺fb瘋狂洗版，分享吓心情有幾咁興奮，估唔到因為一包薯片，竟然喺掀起咗一輪風波！
事緣有一個幕後嘅宣傳人員，完場之後喺fb留言，除咗讚套戲幾咁好睇之外，仲留言：「唯一不愉快係在場遇到一個自以爲天王巨星嘅TVB男artist，從好多TVB前輩口中都聽過呢位上位中嘅小生態度非常差，今日親歷其境，未開場我朋友同我傾偈，佢以為我朋友望佢，佢已經用非常唔友善嘅眼神『睥住』我朋友，到電影開始，我係食電影院購買嘅薯片，佢竟然用極差嘅語氣同我講，你細聲啲！』我好肯定我係冇製造任何不必要嘅聲量，丫巨星不如你表演如何食薯片完全冇聲？你咁驚聽到任何電影以外聲音，你點解唔自己包個戲院睇啦嘛，咁咪冇聲咯。我又冇講野又冇睇電話聽信息。會有咩聲？而且坐得係呢個area嘅都係被主辦邀請嚟嘅人，簡稱行內人，你要覺得自己有幾紅先會用咁冇禮貌嘅語氣同人講嘢？真係火都嚟。」唔少人都有留言問呢個係邊一個，但係佢都冇開名，最後呢個TVB嘅男artist喺自己嘅fb開post講呢件事，原來嗰個就係袁偉豪！
跟住袁偉豪喺自己嘅fb轉發呢個行內人嘅post兼留言，佢話：「請大家不用猜，這幾位行內人所說的人就是我，本來可以靜心去欣賞一場好戲，但後來變成如此收場要讓幾位同行留下不好印象，要讓大家有個不愉快的晚上，首先我表示歉意！」袁偉豪話自己有一點要澄清：「我並沒有用不友善的眼神望著你們，我只有對著當時正在進食nachos時把包裝發出聲響的那位朋友在他耳邊輕聲説聲：「唔好意思，可否細聲一點？」
這位朋友就回應我一下並且表現得很合作，直至電影最後出字幕的一刻，這位nachos先生旁邊的朋友就向我連聲說道：「咁x巴閉包場睇戲呀嗎！未聽過人講話睇戲不准進食！什麼大明星！咁X巴閉，點解要攞免費飛睇呀？」等等⋯⋯」
佢續話：「人之常情，我當刻真的有點火起，但我只有回頭跟這幾位行內人正面説：剛才真係唔好意思，我已經好有禮貌而且在你耳邊細聲說吧！（沒有讓大家失儀的意思）對方説：得！我一定（將事件）擺上網，總之坐咗係你隔離嘅就唔係二打六！我跟他點頭之後我便跟我幾位圈中朋友離場！我想再搞清楚一點，我冇唔准你進食！只係想你能為他人設想，進食時細聲一點！讓大家可以專心觀賞電影而已，而且我們都是主辦單位邀請來的賓客更是沒有分高低你我！」
最後袁偉豪就話：「我不是想和你們有什麼口舌之爭，只是想為我自己做過的事負上責任，無論你是「行內行外人又或者是什麼人也好」只是希望大家可以説一點道理和給大家一些基本專重，多謝！」
(蘋果日報)
