曾患上乳癌的影后出席乳癌活動，同場有其姨甥兼主診醫生鄺靄慧及另一姨甥鄺祖德。見她留有一頭銀白短髮，精神飽滿，現時定居吉隆坡的她表示今次是病後首次在港出席公開活動，亦謂現時用書法及畫畫令自己安心養病，同場她亦有展出自己的書法。
受訪時，陳秋霞表示現時每隔3個月就會回港一次覆診，今早剛抽完血，明天會見醫生：「睇吓癌症指數有冇升，都要控制血糖。（依家身體ok？）ok，係因禍得福，將我人生反轉咗，以前做創作凌晨3點都唔瞓，但依家12點幾就瞓，同埋會做運動，學會更愛惜同保重自己身體。」她亦謂兩年前發現自己有病，當時正要與彭羚及林志美為母校拍MV，但為免他人擔心，所以未有講患癌：「拍MV嗰日佢哋問我做咩咁攰，我呃佢哋話自己耳水不平衡，直至拍完我同校長、佢哋講我下星期要做化療，佢哋就知咩事。」她亦謂患癌是自己疏忽：「有咁好嘅醫生喺身邊，自己都冇定期檢查。」
陳秋霞坦言感恩自己的小朋友沒有遺傳到此病：「我一直最擔心呢樣嘢，但佢哋係冇遺傳到呢個基因，我用咗一年幾嘅時間嚟康復，喺醫院冇嘢做就練書法，有心靈寄託。」問到幾時會出返來唱歌？她笑言：「我依家嗰啲新進歌手都唔識，我呢啲咁老出到嚟都唔知點。（依家好多老一輩歌手出返嚟。）如果樂壇需要我都可以做啲嘢，不過好感恩自細可以同藝術共存。」她又笑言患病期間沒有瘦到，又坦言以前在意自己會出白髮，久不久就要染髮：「我依家61歲，之前50年都係為人哋而活，依家終於可以為自己而活，都希望有生之年可以做多啲慈善嘢。」
之前同大女合照
（on.cc）
