陳柏宇（Jason）日前提到家中兩隻愛犬打交問題，延伸出棄養疑雲，不單只網民鬧爆，連佢老婆符曉薇（Leanne）都喺網上撰文反對棄養，至唔明老公用心，Jason噚日出活動時都有再講，話送走狗狗去朋友屋企寄居只係下下策，非到最絕望時都唔會咁做。
到咗今日，陳太Leanne再喺Instagram撰文，大意係多謝朋友同部份網友支持，又再強調佢哋兩公婆都係愛錫動物之人，平日寧願自己唔夠位瞓都俾啲寵物上床瞓先。o依家兩隻狗狗有問題，作為主人嘅Jason同Leanne都好努力搵方法解決，Leanne仲話：「平時啲網上言論點踩我都可以，但一講到動物、遺棄，呢樣真心介意。」
提到網民鬧爆，Leanne指：「好多人網上睇到幾隻字，就去判斷我哋係點，仲用非常差勁嘅言語攻擊。點解喺大家判斷嘅時候，唔去了解嘅真相？」、「有句我老公講得好啱，當你指住人哋責罵人嘅時候，有冇企喺人哋嘅角度思考？或者去了解真相……」
早前宣佈有喜嘅Leanne話自己可能因為懷孕，情緒有啲偏激，亦因為今次被誤會棄養事件，令佢差啲跌入情緒失控陷阱，而佢喺Ig長文中都有坦言：「知唔知道當一個人脆弱嘅時候，就係一句不負責任嘅評論，可能會影響到一個人生或者，甚至一個生命。」
即係話，各位網民鬧還鬧，不如睇清楚件事嘅來龍去脈先，免得影響到其他人。
(蘋果日報)
