楊愛瑾（Miki）今日喺西寶城出席奧比斯活動，囝囝Luken上個月一歲生日，現時Miki都努力尋求生活上嘅平衡，仲計劃同老公二人世界去旅行，但係呢，Miki就話自己實唔捨得囝囝。
係咪已經計劃再生B？Miki話：「都有傾過，不過依家未完全開始努力，少少想隨緣，因為唔想隔咁耐。」係咪想生個女湊個好字？佢就笑謂：「係天畀嘅，當然開心，有個仔就想有多個女，不過到時如果係仔都開心嘅，咁活潑可以一齊玩。」
之前因為有傳Miki爆閨密吳雨霏（Kary）小產，致姊妹關係決裂，如今Kary已經成功懷孕，有咗6個月，Miki話：「好開心呀！生小朋友我覺得係一份禮物，係冇辦法形容，以前人哋付出去愛你，依家自己付出愛，做媽咪好偉大，我知道都戥佢開心，係女性好大嘅轉捩點。」
Miki仲話有親自恭喜Kary，對方亦有回覆。至於問到會唔會分享育兒貼士？Miki就話：「我啲記性差咗好多，好快唔記得，好健忙，講完都唔記得，要補一補腦同眼。大家得閒都想聚一聚，不過佢第一胎要準備好多嘢，唔急嘅。」問到Kary有冇同佢分享呢胎係仔定女？Miki話：「冇問呀，等佢遲啲自己講。」
(蘋果日報)
