奇妙電視《使乜驚 大兩Gen》繼之前幫黃文慧搞咗個婚禮，原來又為67歲的邵音音預先辦一個生前葬禮，安排於後日節目最終回播出。
患有心臟病的音音姐，早於十多歲已患皮膚癌，一直低調抗癌的音音姐，曾有不平凡的經歷，亦早已將生死看化。節目中，她請來了三位生命中最重要嘅人出嚟，包括杜汶澤、郭子健同彭浩翔，然後由鄺芷凡、吳智杰代佢同「音音三子」進行深情對話，拍攝期間音音姐匿埋喺另一間房，唔俾三子知道。
對話中，阿澤表示對音音姐無限感激，原來倉田保昭參與佢部《空手道》演出，全憑音音姐介紹。當兩個主持問佢如果可以重新選擇時，會揀音音姐定係田蕊妮？阿澤就話：「我會揀音音姐嚟『搞』，揀田蕊妮做老婆！」
導演郭子健就話佢首次執導嘅《野。良犬》，令音音姐首獲金像獎最佳女配角，而呢部戲亦獲得多個國際電影獎項。郭子健由衷地謂：「冇音音姐，就冇我！」音音姐聞言即激動流淚：「郭子健改變咗我嘅人生！我曾經係艷星，一直自暴自棄，但能夠攞獎，令我重新振作，令我肯定自己嘅價值。」
除咗訪問「音音三子」，音音姐仲揀咗啲「遺物」送俾三子做紀念，包括送「士巴拿」俾阿澤，阿澤見到忍唔住笑問：「你送個士巴拿俾我，係咪想我扑你？」至於士巴拿背後故事，後日節目中就會揭曉。
(蘋果日報)
