有傳佢陀B已經5個月，照計o依家已經有6個月，但仲係未見肚，佢有啲支吾以對解釋話：「因為屋企人想低調，唔想我講太多，其實我o依家。。。」據知佢當日產檢時，照咗嬰兒性別，但佢依然口密保持神秘。。。
蔡一鳳早前宣佈成功為老公盛品儒陀B，本身恩愛嘅佢哋家陣更加糖黐豆，日前盛品儒同蔡一鳳又再行孖咇，日前下晝4點左右，打扮樸素嘅蔡一鳳，腳踩波鞋現身中環中建大廈，廿四老公盛品儒傍到實，原來佢哋係去上址做產檢，佢哋睇嘅係婦產科聖手梁淑德。
據資料顯示，梁醫生接生過唔少星B，佢先後幫過郭晶晶、林青霞、盧淑儀同張栢芝等都係搵佢幫手。
盛品儒兩公婆入診所等候期間，蔡一鳳翻閱啲嬰兒雜誌解悶，盛品儒則玩手機消磨時間，偶然傾幾句偈咁，之後佢哋入去見醫生，大約15分鐘後，佢哋離開診症堂，盛品儒去畀錢拎藥，全程貼身照顧老婆。離開中建大廈後，盛品儒兩公婆行咗去太子大廈睇嬰兒用品，盛品儒仲幫老婆拎手袋拎藥，又搭住老婆行，顯得非常緊張。
盛品儒兩公婆入咗一間嬰兒用品店，睇咗嬰兒車同床，又睇咗BB衫，期間佢哋看中一架萬幾蚊嘅嬰兒車，準爹哋盛品儒向店員查詢，可惜店員話暫時冇貨，要等兩個月後，所以佢哋未有落單。
其實蔡一鳳上個月陀住B約待嫁好姊妹鍾欣潼（阿嬌）食飯時，有傳佢陀B已經5個月，照計o依家已經有6個月，但蔡一鳳仲係未乜見肚，《蘋果》聯絡過蔡一鳳問原因，佢有啲支吾以對解釋話：「我o依家先3個幾月，因為屋企人想低調，唔想我講太多。」據知佢當日產檢時，照咗嬰兒性別，但佢依然口密保持神秘。蔡一鳳仲話有照超聲波：「睇到BB喺肚中揈手揈腳好得意。」陀B後嘅蔡一鳳已將工作量大減，唔做女強人，專心安胎。
(蘋果日報)
