自爆曾小產過兩次：「其實預咗要8年時間，之前試過冇咗兩次，其實第一次時好難受，知道冇BB呢件事係冇原因，可能係發育問題。第二次有咗經驗，冇第一次咁難受，但有陰影，有啲生過嘅朋友同我講，其實好普遍，心就舒服啲。呢兩年努力啲，時間緊迫。」
利嘉兒今日陀住4個月孕肚同老公一齊喺尖沙嘴出席時裝活動，佢話：「自己個肚4個月，個肚都好似好大，見到噚日鍾嘉欣5個月條腰仲咁瘦，都有啲妒忌。」
利嘉兒形容現時心態輕鬆：「自己都行得快，都有照去街，朋友覺得我論盡似小朋友，成日提點我，自己好放鬆同平常心。」呢位高齡孕婦依然貪靚，佢話：「啲人叫我唔好再扮靚同搽指甲油，但年代唔同咗，冇傳統限制。成日都會去搵資料同問醫生意見，依家有染頭髮，老公都有唔俾，我捉埋佢見醫生。」
佢又話上星着高㬹鞋同長裙，結果俾人鬧到飛起。好多孕婦要戒口，利嘉兒話自己飲食都有啲慘，有時會偷食同飲汽水，但就有跟醫生講吸收足夠水份同唔好食生冷嘢。問到知道係仔定女未？利嘉兒話：「未知，我冇乜經驗，成日抽血，聽完報告冇嚴重疾病輕鬆晒，點知報告有寫男女，自己決定唔睇。」
講到後來，利嘉兒自爆曾小產過兩次：「其實預咗要8年時間，之前試過冇咗兩次，其實第一次時好難受，知道冇BB呢件事係冇原因，可能係發育問題。第二次有咗經驗，冇第一次咁難受，但有陰影，第二次隔兩年又係咁樣。有啲生過嘅朋友同我講，其實好普遍，心就舒服啲。呢兩年努力啲，時間緊迫。」
(蘋果日報)
