陳小春早前同囝囝Jasper上大陸真人騷，又不時同老婆應采兒喺大陸節目中晒恩愛，成家喺大陸人氣急升，近日應采兒做大陸真人騷《真心大冒險》嘅明星戀愛觀察團，噚日喺長沙舉辦媒體見面會，應采兒先同在場嘅參加者講自己愛情觀，鼓勵年輕人要多啲累積戀愛經驗，應采兒直言唔覺得第一次戀愛就要進入婚姻：「經歷了分手之後， 才知道這種男生、女生到底適不適合自己。年輕的時候都不一定清楚瞭解自己要的是甚麼，你怎麼知道對方要的是甚麼，還是多體會多看看。」
應采兒仲大爆初戀發生喺美國讀書嗰陣，嗰時流行用數字代碼發短信，譬如「6000就代表是good」等，應采兒現時已為人母，對於囝囝未來擇偶要求，應采兒坦言女仔人品最重要，外表反而唔太重要：「怎麼對待家人，怎麼為人處事。我不希望兒子（Jasper）娶一個跟我一樣的。」應采兒笑住解釋屋企只需要佢一個「leader」就可以，其他都係「follower」，唔想喺家中見到「另外一個自己」，認為一個「應采兒」就夠，一山不能藏二虎，應采兒笑言：「我會hold不住她。找一個話少，安靜一點、溫柔的吧。」
此外，乖乖嘅Jasper平日都好文靜，應采兒爸爸噚日喺微博貼出小小春嘅近照，原來Jasper拉住外公喺露台玩煮飯仔，要同外公打邊，仲擺咗好多公仔喺地下，扮係佢哋嘅朋友。
外公留言：「大概太累了，不然怎麼會睡成這樣。」
之後一張相見Jasper瞓咗喺地毯上，睡眼惺忪，似乎玩好到好攰。
(蘋果日報)
