喺facebook貼圖宣佈再度懷孕，佢貼出肚凸凸相後留言：「去韓國隆胸失敗，下垂到肚子了。」佢又透露懷孕近4個月，仲未知道性別：「我想生3個，頭3個月幾驚險，有出現流血，作小產，仲流血不止，醫生都好驚奇個胎冇事，o依家就嚟4個月，穩定落嚟，希望母B平安。」
玄學家陳果齊兒子陳定幫，即係圈中「多仔公」林盛斌（Bob）同一女之母吳若希嘅「御用風水師」，前年陳定幫贈Bob送子觀音，佢去年成功追仔。陳定幫早年為吳若希算姻緣，女方拍拖時帶過澳門闊少男友何兆鴻（Alex）見陳定幫，陳定幫稱讚Alex人品唔錯，成功為Alex加分，結果兩人還奉女成婚。
陳定幫除咗擅於幫人，其實佢自己事業同家庭都唔錯，當日佢同戴夢夢分手，Bob做媒介紹咗model女友楊錳霏（Bee），兩人一拍即合，阿Bee婚後仲為陳定幫生咗可愛囡囡。阿Bee日前喺facebook貼圖宣佈再度懷孕，佢貼出肚凸凸相後留言：「去韓國隆胸失敗，下垂到肚子了。」
《蘋果》今日致電陳定幫，恭喜佢即將升呢第二任爹哋，佢話：「再次做爸爸，梗係非常開心，但最開心應該係囡囡，佢成日一個人，悶到玩手指，o依家生多個，有伴可以倍吓佢。我由小到大係獨子，渴望有弟妹，o依家幫囡囡達成心願。」陳定幫透露太太阿Bee懷孕近4個月，仲未知道性別，佢話：「仔女都咁開心，我想生3個。」阿Bee剛有喜時都驚險萬分，陳定幫話：「頭3個月幾驚險，太太有出現流血，作小產，仲流血不止，醫生都好驚奇個胎冇事，o依家就嚟4個月，穩定落嚟，希望母B平安。」
陳定幫話今次老婆陀B情況同上胎反應好唔同，呢胎食唔到嘢，胃成日頂住，皮膚又差，但上胎陀女就好輕盈同舒服，陳定幫話已開始灌輸囡囡唔好呷醋。為咗獎勵阿Bee辛苦陀B，陳定幫仲送咗間食辣嘢嘅食肆畀老婆打骰，等佢做老闆娘，食肆5月就開張，到時阿Bee名副其實做「辣媽」。陳定幫已追第二胎，問到佢好友吳若希係咪仲打算再生？陳定幫話：「佢話佢想㗎。」
(蘋果日報)
