陳凱琳同龔嘉欣早前去咗橫店拍新劇《包青天之再起風雲》，所以未能喺4月頭返港同「沈大師」沈卓盈過34歲正日生日，不過有心唔怕遲，「少婦聯盟」龔嘉欣、陳凱琳及譚凱琪噚日就同好姊妹沈卓盈補祝生日，並喺IG貼出合照，幾個「少婦」一齊喺中環high tea。
龔嘉欣喺IG留言：「少婦聯盟終於全部齊集香港，可以聚一聚，吃吃下午茶，談談接下來的行動，當然還要為我們的小公主補祝生日。」相中見佢哋齊嘆香檳同蛋糕。
原來「壽星女」沈卓盈並唔知佢哋三個準備咗個蛋糕，佢都多謝好姊妹俾咗佢一個驚喜，至於譚凱琪噚晚就喺微博寫道：「少婦聯盟終於能再聚頭，想念我的寶貝很久了，補祝我們的公主生日快樂。」
陳凱琳就喺IG稱佢哋坐到餐廳開始供應晚餐都未走，睇嚟傾到唔知時間。咁幾個女仔一個墟，又係圈中人，自然大把話題喇!
(蘋果日報)
